ОХУ-ын ерөнхийлөгч Владимир Путиний БНХАУ-д хийсэн айлчлал өндөрлөлөө. Айлчлалын хүрээнд хоёр улсын удирдагч дээд хэмжээний уулзалт хийсэн. 

Энэ уулзалтаар талууд АНУ-ын ерөнхийлөгч Дональд Трампын санаачилсан "Golden Dome" төлөвлөгөөг шүүмжилжээ. 

Тодруулбал Трампын танилцуулсан уг төлөвлөгөө нь агаарын довтолгооноос хамгаалах системийн төлөвлөгөө юм. 

Путин, Ши Жиньпин нар хамтарсан мэдэгдэлдээ "АНУ-ын газар болон агаарт суурилсан пуужин сөнөөгч систем байгуулах төлөвлөгөө нь дэлхийн стратегийн тогтвортой байдалд заналхийлж байна" гэж дурджээ.

Түүнчлэн АНУ болон Оросын хооронд байгуулсан цөмийн зэвсгийн нөөцийг хязгаарлах гэрээг сунгалгүй дуусгасанд Вашингтоныг шүүмжлэв. 

Энэ мэтчилэн талууд олон зүйл дээр санал нэгдсэн ч Оросын талаас олон жил эрэлхийлсэн байгалийн хийн хоолой барих төсөлд тодорхой ахиц гаргаж чадсангүй. 

Тодруулбал "Сибирийн хүч-2" нэртэй уг төслийн хүрээнд 2600 км урттай хоолойг Монголын нутгаар дамжуулан барьж, жилд 50 тэрбум шоо метр хүртэлх байгалийн хийг ОХУ-аас БНХАУ-д нийлүүлэх зорилготой юм. 

Өнгөрсөн есдүгээр сард Путин БНХАУ-д айлчлахдаа уг төслийг урагшлуулах тохиролцоонд хүрсэн хэмээн мэдэгдэж байв. 

Гэвч Хятадын талаас энэ төслийн талаар олон нийтэд маш бага мэдээлэл өгсөөр ирсэн. Ши Жиньпин лхагва гарагт эрчим хүч, нөөцийн хамтын ажиллагааг Хятад-Оросын харилцааны “тогтворжуулагч чулуу” гэж нэрлэсэн ч дээрх төслийг шууд дурдаагүй.

Кремль хоёр тал төслийн үндсэн параметрийн талаар “ерөнхий ойлголцолд” хүрсэн гэж мэдэгдсэн ч тодорхой хугацаа, нарийн мэдээлэл өгөөгүй байна.

Байгалийн хийн үнэ, санхүүжилт, гэрээний нөхцөл зэрэг гол асуудлууд шийдэгдээгүй хэвээр байгаа бөгөөд шинжээчид хэлэлцээ олон жил үргэлжилж магадгүй гэж үзэж байна.

Эх сурвалж: Reuters