Төрийн албаны хэрээс хэтэрсэн хүнд суртал, дабль стандарт иргэдийг бухимдуулж байна.

Үүний хамгийн тод жишээ нь “Замын-Үүдийн гааль”. АТГ-аас Замын-Үүд дэх Гаалийн газрын дарга Б.Ундрах болон нэр бүхий албан тушаалтнууд хамтран бусдаас их хэмжээний хахууль авсан байж болзошгүй нөхцөл байдал тогтоогдсон учир албан өрөөнд нь нэгжлэг хийж байна гэх мэдээлэл хэдхэн хоногийн өмнө гарч байв.

Ингээд зогсохгүй гаалийн ажилтныг бусдаас 50 сая төгрөгийн хахууль авч байхад нь газар дээр нь баривчилсан мэдээлэл ч ил болж байв.

Ийнхүү Замын-Үүдийн гааль дээр хяналт шалгалт эрчимжиж, хулгай луйврын хэрэг илрэхтэй зэрэгцэн энэ хэрээр гомдол мэдээлэл гаргасан иргэдийг араандаа зууж, ачаа барааг нь хил дээр боож чирэгдэл үүсгэж буйг цахим орчинд иргэд шүгэл үлээж байна.

Ачаа болгоныг задалж оймс нэг бүрийг тоолж, ширхэг будаанд хүртэл татвар ногдуулж байгаа гэх Замын-Үүдийн гаалийн байцаагчид УУРАА НОМХОН ИРГЭДЭД ГАРГАЖ, дураараа авирлаж байна.

Аргаа ядсан иргэд “ГААЛЬД ТАНЬДАГ ХҮН БАЙНА УУ” хэмээн эрэл сурал болж, эд хөрөнгө, санхүү мөнгө, эрхэлж буй бизнесээрээ хохирох дээрээ тулжээ. Гаалийн байцаагчдийн ӨШӨӨ АВАЛТ ядарсан иргэд дээр хатуу бууж, эдээ бээрэндээ баригдсан энэ байгууллага иргэдийн эрх ашгийг ноцтойгоор зөрчиж байна.

Гаалийн байгууллагын удирдлагыг солиод ужгирсан асуудлыг шийднэ гэх үе үеийн Засгийн газрын мэргэн санаа хэзээ ч бүтэхгүйг олон жилийн туршлага харуулж буй.

Иймд ЗАМЫН-ҮҮДИЙН ГААЛЬД бүтэн цэвэрлэгээ хийж, төрийн албыг төрийн алба хэвээр нь авч үлдэхгүй бол дамчин, наймаачин, авлигачин, хулгайчдын үүр уурхай болж дуусах нь.