НЭМЭЛТ: 

УИХ дахь МАН-ын бүлгийн өнөөдрийн хуралдаанд Ерөнхий сайд Н.Учрал оролцож тодорхой асуудлаар мэдээлэл өгчээ. Энэ талаар УИХ дахь МАН-ын бүлгийн дарга Ж.Батжаргал “Нийслэлийн Засаг даргыг чөлөөлсөн асуудлаар мэдээлэл өгсөн. Хуульд заасны дагуу хүлээсэн үүргээ хангалттай биелүүлж ажиллаагүй байна гэдэг асуудлыг хэлсэн. Улаанбаатар хотод  хэрэгжиж байгаа том төслүүдийг шалгахын тулд түр зогсоосон гэдгээ хэлсэн. Хууль хяналтын байгууллага шалгаад иргэдэд мэдээллийг хүргэх ёстой.

Махны тухайд, нөөцийн махнаас 1200 орчим тонн нь агуулахад байна, 1300 орчим тонн махыг тодруулах шаардлагатай, 2500 тонн мах иргэдэд очсон. Хуулийн байгууллагад шалгах үүрэг чиглэл өгсөн, ойрын хугацаанд мэдээлэл өгөх байх.

Засгийн газар өнөөдөр 14:00 цагаас үнийн өсөлтийн эсрэг авч хэрэгжүүлэх арга хэмжээний талаар хэлэлцэнэ" гэлээ.

Мөн бүлгийн хуралдаанаарМонгол Улсын Ерөнхийлөгчийн Сонгуулийн тухай хуульд нэмэлт, өөрчлөлт оруулах тухай хуулийн төслийг хэлэлцжээ. Хуулийн төслийн гол зорилго нь санал авах өдөр хүрэлцэн ирж чадахгүй сонгогч санал авах өдрөөс өмнөх 3 хоногийн дотор харьяа санал авах байранд урьдчилан очиж, санал өгч болохоор хуульчилж, сонгогчдын сонгох эрхийг бодитоор хэрэгжүүлэх, санал өгөх боломжийг нэмэгдүүлэх эрх зүйн орчин бүрдүүлэх юм. Гадаад улсад ажиллаж, амьдарч байгаа 240 мянган иргэн сонгуульд оролцохын тулд урьдчилан бүртгүүлэх шаардлагатай байсан бол шинэ хуулийн дагуу уг шаардлагыг хасаж, иргэд шууд санал өгөх боломжтой болно. Гадаадад санал авах хугацаа санал авах өдрөөс 13 хоногийн өмнө эхлэж, 5 хоногийн турш санал авах ажлыг зохион байгуулж, цагийг 07:00–17:00 цаг байхаар тусгасан байна.

МАН-ын бүлэг Улаанбаатар хотын захирагчийг чөлөөлсөн асуудлыг хэлэлцэж байна

УИХ дахь МАН-ын бүлэг өнөөдрийн /2026.05.18/ ээлжит хуралдаанаараа Нийслэлийн Засаг дарга бөгөөд Улаанбаатар хотын захирагч Х.Нямбаатарыг чөлөөлсөн асуудлыг хэлэлцэж байна. Ерөнхий сайд Н.Учрал Улаанбаатар хотын захирагч Х.Нямбаатарыг махны үнийн өсөлтийг хязгаарлаж чадаагүй үндэслэлээр өнгөрсөн амралтын өдөр чөлөөлсөн юм.

Нийслэлчүүдийн махны хэрэгцээг хангах зорилгоор Улаанбаатар хотын захирагчийн ажлын алба нь 5000 тонн мах бэлтгэсэн. Уг нөөцийн махыг өнгөрсөн нэгдүгээр сарын 15-наас эхлэн худалдаанд гаргасан. Гэвч махны үнийг бууруулахад нөлөөл үзүүлж чадаагүй юм. Учир нь махны үнэ өвлөөс эхлэн огцом өссөн бөгөөд сар шинийн баяр болохтой зэрэгцэн "Хүчит шонхор" худалдааны төвд үхрийн цул мах нэг кг нь 35 мянган төгрөгт хүрсэн.  Мөн хонины ууц хамгийн хямд нь 600 мянган төгрөг давсан. Ард иргэд "Махны үнийг төр зохицуулахгүй бол мөдхөн 40 мянган төгрөгт хүрэх нь" гэдэг асуудлыг тавьж ирсэн. Харин Засгийн газар ямар ч арга хэмжээ аваагүй. Эцэстээ махны үнэ өссөөр нэг кг үхрийн цул мах 40 мянган төгрөгт хүрсэн нь Улаанбаатар хотын захирагчийг албан тушаалаас нь чөлөөлөх үндэслэл болсон нь энэ.

Нөөцийн мах бэлтгэсэн компаниудын хувьд "Өнгөрсөн шөнө Тагнуул, цагдаа, АТГ-ынхан ирж агуулах дахь нөөцийн махыг лацадсан тул худалдаанд гаргах боломжгүй байна" гэдэг тайлбар хийж буй. Иймээс нөөцийн хямд үнэтэй мах авах гэсэн иргэдийн хувьд хуулийн байгууллагынхны шалгалт дуусах хүртэл хүлээх шаардлагатай болж байгаа юм.

Олон нийтийн хувьд Улаанбаатар хотын захирагчийг махны үнийг хязгаарлаагүй үндэслэлээр огцруулсан нь утгагүй. Төр махны бодлогогүй болсонд Улаанбаатар хотын захирагч буруутай биш. Засгийн газар бодлогоо тодорхойлох ёстой. Экспортод нэг кг хонины мах 14000-16000 төгрөгөөр гаргадаг байтлаа дотооддоо 28000-30000 төгрөгөөр худалдан авч байгаа нь бодлогогүй болсны илрэл гэж үзэж буй. Мөн ченжийн тогтолцоог халахгүйгээр нөөцийн мах бэлтгээд нэмэргүйг жил бүр махны үнийн өсөлт харуулдаг ч Засгийн газар "Мах үнэтэй байх нь малчдад ашигтай" гэдэг жижүүрийн үгээр тайлбар хийсээр өнөөдрийг хүргэсэн юм.