Шинээр томилогдох Элчин сайд нар хэн бэ

Улс төрд томилгоо ар араасаа үргэлжлэх төлөвтэй байна. Прокурорын цуврал томилгоонуудын араас АТГ-ын удирдлагууд болон  шүүгч нарынх үргэлжлэхээр байна.  Үүнтэй зэрэгцээд гадаад орнуудад суух Элчин сайд нарын  “амттай” томилгоо үргэлжлэх нь тодорхой боллоо.

ОХУ-д суугаа элчин сайд Б.Дэлгэрмааг буцааж татахаар болж байна. Тэрбээр 2015 оны арванхоёрдугаар сарын 17-нд Элчин сайдаар томилогдож байсан юм.   Хэдхэн хоногийн өмнө АН-ын дэд даргаар хууль зөрчин сонгогдсон нь эргүүлэн татах  гол үндэслэл болж байна.  Эрх баригч МАН-ын бүлэг өчигдөр энэ асуудлыг дэмжчихлээ.

Эдгээрээс гадна  хэд хэдэн улсад суух элчин сайдын томилгоо хүлээлттэй хэвээр байгаа. Үүнтэй холбоотойгоор Гадаад харилцааны яамнаас 10 орчим оронд суух  Элчин сайдын томилгооны  асуудлыг  УИХ-ын чуулганд танилцуулахад бэлэн болоод байгаа ажээ. Тухайлбал, өнгөрсөн  онд Казахстан, Польш, Унгар, Египет, Тайланд, Сингапур, Лаос, Киргиз, Австралид суух Элчин сайд нарын томилолтын хугацаа дуусжээ. Түүнчлэн Канад зэрэг гурван  ч улсад элчин сайдад яригдаж байсан Н.Чимгүүндарь, Б.Хурц, Г.Тэнгэр нарын нэрийг  эргүүлэн татахаар болсон. 

Хэн хэн  хаана элчингээр томилогдох нь одоогоор тодорхойгүй ч   яригдаж буй хүмүүсийн нэрс  албаны хүрээнд түрүүчээсээ тодорч эхлээд байна.

Тодруулбал, Гадаад харилцааны яамны Ази Номхон далайн орнуудын газрын захирал Э.Сарантогос, Европын газрын захирал М.Цэнгэг, Гэрээ, эрхзүйн газрын захирал А.Төмөр, мөн яамны Бодлого төлөвлөлтийн газрын захирал Ш.Одонбаатар, Хөрш орнуудын газрын захирал Т.Жанабазар, Гадаад худалдаа, эдийн засгийн хамтын ажиллагааны газрын захирал В.Энхболд, Төрийн захиргаа, удирдлагын газрын захирал Н.Анхбаяр , Америк, Ойрхи Дорнод, Африкийн газрын захирал Д.Гансүх нарыг дээрх улсуудад суух Элчин сайдаар томилохоор ярьсан байна.

Энд нэр дурдагдаж байгаа Н.Анхбаяр нь Хууль зүй, дотоод хэргийн сайд Ц.Нямдоржийн хүү  бөгөөд одоо Австри улсад Элчин сайдаар яригдаж байгаа ажээ.

Дашрамд дурдахад Гадаад орнуудад суух Элчин сайд нарын хугацаа 3 жил байсныг өөрчилж 4 жил болгон нэмэгдүүлээд байгаа билээ.