Спортын дуулиан 5: Монголчууд "Багийн спортоор амжилт гаргахгүй" гэдэг ҮЛГЭР төгсгөл болов

Тайвань Азийн оюутны эмэгтэй багуудын АШТ-д Хонг Конг, Макаог хожин 5-р байр эзлэв.

3х3 Сагсан бөмбөгийн шигшээ баг. Азийн элсний спортын наадмын мөнгөн медальт.

3х3 Сагсан бөмбөгийн оюутны шигшээ баг. Оюутны ДАШТ-ий мөнгөн медальт.

Сагсан бөмбөгийн оюутны шигшээ баг. Оюутны Азийн АШТ-ий аварга

2013 онд ОХУ-ын Казань хотноо зохиогдсон Дэлхийн Оюутны Универсиад Их наадамд Монголын сагсан бөмбөгчид анх удаагаа оролцсон билээ. Манай оюутан залуус хэсэгтээ Серби, Румын, Япон, Филиппинийг хожин шилдэг 16-д шалгарч, хөгжөөн дэмжигчдээ баярлуулан, өөрсдөө ч урам зориг орон амжилт гаргах итгэл дүүрэн болсон юм. Урьд өмнө нь олон онооны зөрүүгээр хожигдон, хөгжөөн дэмжигчидээ гонсойлгодог байсан бол Казаньд болсон наадмаас хойш манай тамирчид шат шатаар ахисаар байна. Яг жилийн дараа БНСУ-ын Инчён хотноо болсон Азийн наадамд эрэгтэй, эмэгтэй баг амжилттай оролцож, наймдугаар байр эзэлсэн билээ.

Үүний зэрэгцээ ирээдүй хойч үеээ бэлдэхэд анхаарч Сурагчдын болон U 15-17, өсвөр залуучуудын 3х3 зэрэг олон улсын тэмцээнүүдэд тамирчдаа сургаж оролцуулан туршлага суулгасанаар өнөөдрийн амжилтад хүрээд байгаа юм. Энэ онд л гэхэд ОХУ-ын Санкт-Петербург хотноо болсон Бүх Оросын сурагчдын АШТ-ээс эрэгтэй баг хүрэл медаль, Австри улсын Клагенфурт хотноо болсон "United World" тоглолтын эрэгтэй U16 насны ангилалд хүрэл медаль хүртсэн.
Мөн Тайваньд болсон Азийн оюутны эмэгтэй багуудын АШТ-д Хонг Конг, Макаог хожин 5-р байр эзэлсэн билээ.

Мөн эх орондоо зохиогдсон Ази тивийн оюутны сагсан бөмбөгийн аварга шалгаруулах 6-р тэмцээнд Монголын оюутны шигшээ баг шалгарч, Тайвань, БНХАУ-ын баг мөнгө, хүрэл медаль эзэд болсон юм.

Улаанбаатар хотноо зохион байгуулагдсан Азийн оюутны сагсан бөмбөгийн аварга шалгаруулах тэмцээнд Монгол, БНХАУ, БНСУ, Тайвань, Хонг Конг, Макао, Казахстан гэсэн долоон орны баг өрсөлдсөн бөгөөд манай шигшээ баг өмнө хоёр ч удаа хүрэл медаль зүүсэн амжилттай байсан.

Үүнээс хэдхэн хоногын дараа есдүгээр сарын 29-нд Вьетнамын Данан хотноо болж буй Азийн элсний V наадмын 3x3 сагсан бөмбөгийн тэмцээнд Монголын эрэгтэй баг мөнгөн медалийн эзэн болсон юм.

Манай сагсан бөмбөгчид хагас шигшээд Иракийн багийг 20:7-гоор хожиж, шигшээд шалгарсан бол аваргын төлөө Катарын багт 15:12 харьцаагаар хожигдон, мөнгөн медаль хүртсэн.

Энэ оны ОРГИЛ амжилтаа БНХАУ-ын Шиамен хотноо 2016 оны арваннэгдүгээр сарын 19-24-нд оюутны дэлхийн аварга шалгаруулах 3х3 сагсан бөмбөгийн тэмцээнд гаргаж ДАШТ-д анх удаагаа Мөнгөн медалийн болзол хангасан юм. Монголын тамирчид энэ тэмцээнд оролцох эрхээ БНХАУ-ын Мүгдэн хотноо 2015 онд болсон Ази тивийн АШТэмцээнд амжилттай оролцон мөнгөн медаль хүртсэнээр авсан ба Дэлхийн оюутны спортын холбоонд бүртгэлтэй 190 гаруй орноос зөвхөн эрхээ авсан шилдгүүд нь оролцдог онцлогтой тэмцээн юм. Уг ДАШТ-д таван тивийн шилдэг 32 эрэгтэй, эмэгтэй багууд өрсөлдсөн. Өмнө нь Монголчууд сагсан бөмбөгийн спортоор дэлхийн хэмжээний тэмцээнд оролцсон түүх байхгүй байсан ч анх удааг оролцоод өндөр амжилт үзүүлэн гайхамшиг бүтээсэн. Монголын багийн бүрэлдэхүүнд Ази тивийн 2015 оны аваргын 3х3 тэмцээний мөнгөн медальт А.Гансүх, Э.Дөлгөөн, Б.Батзолбоо, Г.Чинбат нарын тамирчид өрсөлдсөн ба багийн дасгалжуулагчаар С.Тулга, ахлагчаар Мон-Алтиус БТДС-ийн захирал М.Өсөхбаяр нар ажилласан юм.

Б.Батзолбоо, А.Гансүх, Э.Дөлгөөн, Г.Чинбат нар хэсэгтээ Хятад, Тайланд, Малайзыг хожиж, Унгарын шигшээ багтай тоглохдоо тактикийн ялагдал хүлээж, хэсгээсээ хоёроор гарсан. Хасагдах шатанд Австралийн багийг, хагас шигшээд Азийн гурван удаагийн аварга Ливаныг хожоод аваргын төлөө тооцоолж байсны дагуу Францын шигшээ багтай тоглосон.

2016 оны Дэлхийн аварга шалгаруулах тэмцээний финалд Монголын баг Францын багт 12:19 харьцаатай хожигдол хүлээн мөнгөн медалийн эзэд боллоо. Франц Улсын хувьд 2013 оны Европ тивийн аварга, Олимпийн хоёр удаагийн мөнгөн медальт дэлхийд сагсан бөмбөгөөр тэргүүлэгч орнуудын нэг билээ.

Монголчуудын хувьд сагсан бөмбөгийн төрлөөр Дэлхийн дэвжээнд анх удаа өрсөлдсөн нь анхны тохиолдол, бүр цаашлаад мөнгөн медалийн болзол хангасан нь багийн спортын түүхэн дэх Дэлхийн тэмцээний анхны медаль болсон. Цааш цаашдаа бэлтгэл сургуулилтаа улам сайн хийж, тив, дэлхий, Олимпийн наадамд оролцох цаг манай залууст ойрхон байна.

Ч.Амартүвшин