Японы ард түмэн байгалийн гамшигт хохирогчдын дурсгалыг хүндэтгэнэ

Одоогоос 11 жилийн өмнө буюу 2011 оны 3 дугаар сарын 11-ний өдөр Япон улсын зүүн, зүүн хойд бүс нутаг цунами, газар хөдлөлтийн гамшигт өртөж, олон мянган хүн амь үрэгдэж байсан. Японы ард түмэн энэ өдрийг гамшигт амиа алдсан хүмүүсийн дурсгалыг хүндэтгэн, төрөл бүрийн үйл ажиллагааг зохион байгуулж байгаа юм байна. Харин Японы Засгийн газар жил бүр зохион байгуулдаг зан үйлийг зогсоосон учраас энэ жил төрийн санхүүжилттэй ёслол болохгүй аж.

2011 оны 3 дугаар сарын 11-ний өдөр Японы зүүн хойд далайн бүсэд 9 магнитын хүчтэй газар хөдлөлт болж улмаар 10 метрийн өндөр цунами үүсгэж байсан. Өнөөдөр цунами болсон цагт буюу 14:46 минутын орчимд хохирогчдын дурсгалыг хүндэтгэж, нэг минут дуугаа хураах ёслолыг иргэд зохион байгуулах юм байна. Энэ гамшигт 18,423 хүн амь үрэгдэж, сураггүй болсон гэж эрх баригчид нь тооцоолжээ. Газар хөдлөлт, цунами, түүнээс үүдэлтэй цөмийн цахилгаан станц доголдсоноос үүдэж Иватэ, Мияги, Фукушима зэрэг мужийн 40 гаруй хот сууринд асар их хэмжээний хохирол учирч, цөмийн цацраг идэвхт бодисоор бохирдсон усыг гадагшлуулж ч чадаагүй байна.

Тэдгээр 28 хот суурингийн хүн ам гамшиг болохоос өмнөх үетэй харьцуулахад 10 гаруй хувиар буурсан аж. Фукушима мужийн Футаба хотын бүх оршин суугч цацраг идэвхт бодисын хор хөнөөлөөс болгоомжлон өнөөдрийг хүртэл гэртээ харьж чадахгүй байна. Тус мужид цөмийн цацраг идэвхт бодистой холбоотой аюулгүй байдлын үүднээс иргэдийг нүүлгэн шилжүүлэх журам цуцлагдаагүй байгаа юм. Үүний зэрэгцээ тус бүсэд оршин сууж байсан иргэдийг тусгаарлах асуудал ч иргэдийн дунд том асуудал болжээ. Тухайлбал, өнгөрсөн онд Мияаги, Иватэ, Фукушима мужид нийтийн байранд тусгаарлагдан амьдарч байгаа иргэдээс 72 хүн нас баржээ. Хэдийгээр гамшиг болсноос хойш 11 жил өнгөрч байгаа ч энэ мэтээр энгийн хүмүүсийн аж байдалд үзүүлэх сөрөг нөлөөлөл арилаагүй байгаа талаар ЭнЭйчКей агентлаг хөндсөн байна.