“Эх орны цэрэг-2022” яруу найргийн наадам энэ сарын 15-нд болно

“Эх орны цэрэг-2022” яруу найргийн наадам энэ сарын 15-нд зохион байгуулагдах гэж байна. Эрхэм уншигч танд тус наадмын удирдамжийг хүргэж байна.

Нэг. Зорилго

Монгол Улсын Батлан хамгаалах асуудал эрхэлсэн төрийн захиргааны төв байгууллагын 111 жилийн ой, Орчин цагийн Зэвсэгт хүчин үүсэн байгуулагдсаны 101 жилийн ой, Цэргийн дуу, бүжгийн эрдмийн чуулгын түүхт 90 жилийн ойг тэмдэглэн өнгөрүүлэх арга хэмжээний хүрээнд цэрэг эх орны сэдэвт яруу найргийн өв санг баяжуулах, цэргийн алба хаагчид, ард иргэд, хүүхэд залуучуудад төрөлх нутаг, тусгаар тогтнол, түүх соёлоороо бахархах сэтгэлийг төрүүлэх, цэрэг-эх оронч үзлийг төлөвшүүлэх, иргэн-цэргийн харилцааг бэхжүүлэх, яруу найргийн шилдэг бүтээлүүдийг сурталчлан нийтийн хүртээл болгоход оршино.

Хоёр. Хугацаа

1. I шатны шалгаруулалтыг 2022 оны 03 дугаар сарын 13-ны өдөр,
2. II шатны шалгаруулалтыг 03 дугаар сарын 15-ны өдрүүдэд тус тус зохион байгуулна.

Гурав.Тавигдах шаардлага

Наадамд ирүүлэх шүлгүүд нь цэргийн сэдэвтэй, яруу найргийн наадамд уншигдаж байгаагүй шинэ бүтээлүүд байна. Уралдаанд оролцох яруу найрагчид цэргийн сэдэвт 2 шинэ бүтээлээ 2022 оны 03 дугаар сарын 13-ны өдрийн 16.00 цаг хүртэл ЦДБЭЧ-ын 205 тоотод бүртгүүлж, оролцох эрхийн мандат авна. /Мандатын үнэ 10.000 төгрөг/

Дэлгэрэнгүй мэдээллийг 89074727 дугаараас тодруулах боломжтой.

Дөрөв. Наадмын зохион байгуулалт

Наадмын I шатанд ирүүлсэн бүтээлүүдийг шүүгчдийн бүрэлдэхүүн хэлэлцэж, II шатанд 20 яруу найрагчийг шалгаруулна.

II шатанд шалгарсан яруу найрагчид 2022 оны 03 дугаар сарын 15-ны өдөр 3 үе шаттайгаар шүлгээ уншиж, шилдгээ тодруулна.

Яруу найрагчдыг үе бүрт онооны дарааллаар хасагдах байдлаар шалгаруулна.

Тав. Шагнал

Амжилттай оролцсон бүтээлийг дараах байдлаар байр эзлүүлэн урамшуулна.

• Тэргүүн байр – 1 /Өргөмжлөл, 1,000,000 төгрөг, Жанжны сэлэм/
• Дэд байр – 1 /Өргөмжлөл, 700,000 төгрөг/
• Гуравдугаар байр - 1 / Өргөмжлөл, 400,000 төгрөг/
• Тусгай байр - 1 / Өргөмжлөл, 200,000 төгрөг/