"Ч.Мөнхбаяр Үндэсний аюулгүй байдлын эсрэг гэмт хэрэг үйлдэх санаа зорилгогүй"

Гадаадын тагнуулын байгууллагатай хамтран ажилласан гэх үндэслэлээр цагдан хоригдож, шалгагдаж буй иргэн Ч.Мөнхбаярын өмгөөлөгчид мэдээлэл хийлээ.

Өмгөөлөгч Г.Баасан "Тагнуулын байгууллагаас 2022 оны хоёрдугаар сарын 17-нд иргэн Ч.Мөнхбаярыг баривчлан саатуулж, маргааш нь олон нийтэд мэдээлэл хийсэн. Уг мэдээлэлд иргэн Ч.Мөнхбаяр нь гадаадын тагнуулын байгууллагатай хамтран ажиллаж, мөнгөн урамшуулал авч байсан. Түүнийг үйлдэл дээр нь баривчилсан гэсэн.

Гэтэл тагнуулын байгууллагын дээрх мэдээлэл нь шүүхийн шийтгэх тогтоол гарах хүртэл хүн, хуулийн этгээдийг гэм буруутайд тооцохгүй гэдэг хуулийн заалтыг зөрчсөн. Иргэн Ч.Мөнхбаярыг үйлдэл дээр нь барьсан гэх боловч гадаадын тагнуулын байгууллагын этгээдийг баривчлан, яллагдагчаар татаагүй, гадаадын тагнуулын байгууллагын алба гэдгийг нотлоогүй. Ийнхүү нотлогдоогүй мэдээлэл тарааж, иргэн Ч.Мөнхбаярыг сүр бадруулан баривчилж, яллана гэж заналхийлсэн. Энэ нь мөн эрүү шүүлт тулгах гэмт хэргийн шинжийг агуулж байна.

Энэ хэргийн гэмт хэргийн бүрэлдэхүүнтэй гэж үзэх юм бол гадаадын тагнуулын байгууллага мөн болохыг тогтоосон, Монгол Улсад учруулсан хохирол нь тодорхой байх ёстой. Гэтэл тагнуулын байгууллага мөн эсэх, Монгол Улсын ямар эрх ашиг хохирсон нь тодорхойгүй байна.

Иргэн Ч.Мөнхбаяр Үндэсний аюулгүй байдлын эсрэг гэмт хэрэг үйлдэх санаа зорилгогүй. Энэ нь түүний монгол бичиг соёлоо хамгаалах, Өвөрмонголчуудын зөрчигдсөн эрхийг хамгаалах, элэг нэгт монгол үндэснийхээ эрх ашгийг дээдэлсэн үзэл санааны төлөө дуу хоолойгоо өргөсөөр байдгаас илэрхий харагдана.

Ч.Мөнхбаяр улсын нууцыг мэдэх боломжгүй иргэн. Ч.Мөнхбаярыг улс төрийн захиалгатайгаар, сүр дуулиантайгаар баривчилсан. Удахгүй улс төрийн захиалгыг илчилнэ. Улсын нууцтай холбоотой ямар ч мэдээлэл түүнд байгаагүй. Гадаадын байгууллагын хүнтэй үүсгэсэн харилцаа нь төрийн нууцад тооцогдох уу гэдгийг тогтоогоогүй байна. Хууль бусаар цагдан хорьж, ял оноох гэж байна. Ч.Мөнхбаярын хувьд зөвхөн орос хэлтэй. Монгол бичиг соёлоо хамгаалахын төлөө дуу хоолойгоо хүргэж ирсэн. Ч.Мөнхбаярыг байнга эргэж байгаа. Сэтгэл зүйн болоод бие нь сайн байгаа. Өөрийгөө гэмт хэрэг хийгээгүй гэдэгт итгэлтэй байгаа. Ч.Мөнхбаяр гэлтгүй гадны байгууллагатай хамтарч ажилладаг байгууллага, орчуулагч, бүх иргэнийг гэмт хэрэгтэн гэж  яллах боломжтой хууль Монголд хэрэгжиж байна” хэмээсэн юм.