Х.Нямбаатар: Хөгжлийн Банканд 2016 онд хийсэн 130 хуудас шалгалтын дүнг нийтэд ил болгоно

    Засгийн газрын өнөөдрийн хуралдаанаар Хөгжлийн банкны 2016 оны шалгалтын дүгнэлтийг нууцаас гаргах асуудлыг хэлэлцжээ.

Энэ талаар ХЗДХ-ийн сайд Х.Нямбаатар "Манай яамнаас Хөгжлийн банкны 2016 оны шалгалтын дүнг нууцаас гаргах саналыг Засгийн газарт оруулж хэлэлцүүлж байна. Мөн УИХ-ын гишүүн Б.Энхбаяр энэ саналыг Засгийн газарт оруулсан. Тэрбээр тухайн үед уг ажлын хэсгийг ахалж ажиллаж байсан. Өнгөрсөн хугацаанд тухайн ажлын хэсгийн шалгалтын мөрөөр хууль хяналтын байгууллагууд ямар ажлууд хийгдсэн, ямар ажил нь замхарсан юм бэ гэдгийг ил тод болгохыг хүссэн. 130 хуудас шалгалтын материал байгааг бид ил болгож байна. Тухайлбал, тодорхой эх үүсвэрүүдийг татан төвлөрүүлсэн мөнгийг ямар байдлаар зээл болгож гаргасан юм бэ, ямар эх үүсвэрүүдэд нь тухайн үедээ ноцтой анхааруулж, дүгнэлт гаргасан юм. Ямар зээлүүдийг авсан эздийг хууль хяналтын байгууллагад шилжүүлсэн юм, энэ зургаан жилийн хугацаанд хэрэг хэрхэн шийдэгдсэн гэх асуудлыг ил болгож байна. Засгийн газрын тогтоол албажмагц энэхүү шалгалтын дүнд хэвлэж авах боломжтой.

Тухайн үед ОУВС-ын хөтөлбөрт хамрагдахын тулд санхүүгийн эрсдэлтэй нөхцөл байдлаа ил байлгах шаардлагагүй гэж үзсэн учраас нууцад оруулсан байсан” хэмээлээ.