Ээжээ баярлуулж, эмэгтэйчүүд охидоо хайрлан хүндэтгэх  баярын өдөр 

Өнөөдөр Олон улсын эмэгтэйчүүдийн эрхийг хамгаалах өдөр тохиож байна.Энэ бол олон улсын эмэгтэйчүүдийн хамгийн өргөн тэмдэглэдэг баяр юм.  Тиймээс Монголынхоо саран гоо ээжүүд, нийт эмэгтэйчүүддээ баярын мэнд хүргэж, амьдрал, ажил үйлст нь өндрөөс өндөр амжилт хүсэн ерөөж байна.

  Жил бүрийн гуравдугаар сарын 8-ыг улс орнууд бүх нийтийн баярын өдөр болгохоос эхлээд эмэгтэйчүүдийн эдийн засаг, улс төр, нийгэмд эзлэх байр суурийг бэхжүүлэхэд анхаарах зэргээр янз бүрээр тэмдэглэдэг.

Монгол улсын хувьд энэ баяр улс төрийн утгаа үндсэндээ гээж орхигдуулжээ.  Харин энэ өдөр  ээжээ баярлуулах, эмэгтэйчүүд охидоо хайрлан  хүндэтгэх утгатай болсон бөгөөд бүх нийтээр амрах баярын өдөр болсон байдаг.

Хэрэв энэ баярын үүх түүх, уг гарвалыг хөөвөл бүр 1910 онтой холбогдоно. Тодруулбал, 1910 онд Хоёрдугаар Интернационал  олон улсын эмэгтэйчүүдийн  чуулганыг Копенхаген хотноо анх удаа хуралдуулж, олон улсын эмэгтэйчүүдийн өдрийг бий болгожээ. Санаачлагч нь Германы социалист үзэлтэй эмэгтэй Клара Цеткин гэж үздэг.

Хожим нь 1975 онд буюу 64 жилийн дараа НҮБ энэ өдрийг албан ёсоор тэмдэглэж эхэлсэн аж. НҮБ-ын зүгээс жил бүрийн гуравдугаар сарын 8-ныг дэлхийн эмэгтэйчүүдийн өмнө тулгамдаад буй асуудлуудад үнэлэлт дүгнэлт өгч, тухайн жилдээ эмэгтэйчүүдийн эрхийг хамгаалахад ашиглах уриаг танилцуулдаг уламжлалтай юм.

Монгол Улс эмэгтэйчүүдийн эрх чөлөө, жендерийн тэгш байдлаараа дэлхийд дээгүүрт эрэмбэлэгдэх орны нэг. Эмэгтэйчүүдийн эрхийг хамгаалах энэ өдрийг тохиолдуулан Монголын эмэгтэйчүүдийн талаарх зарим тоо баримтыг хүргэж байна.  

 - Хүн ам, орон сууцны 2020 оны ээлжит тооллогын дүнгээр Монгол Улсын харьяат хүн амын тоо 3 296.9 мянга болсон нь 2010-2020 оны хооронд буюу нийт 10 жилийн хугацаанд 542.2 мянган хүнээр буюу 19.7 хувиар өссөн бол эрэгтэйчүүд 18.7 хувиар, эмэгтэйчүүд 20.6 хувиар нэмэгджээ.

-Монгол Улсын хүн амын 49.1 хувийг эрэгтэйчүүд, 50.9 хувийг эмэгтэйчүүд эзэлж байна.

- Улсын хэмжээнд 2021 оны жилийн эцсийн байдлаар 71 166 эх амаржиж, 73 866 хүүхэд төрүүлсэн нь өмнөх оноос амаржсан эх 4 528 (6.0%)-аар, төрсөн хүүхэд 4 080 (5.2%)-ээр тус тус буурчээ.

-Манай эмэгтэйчүүдийн дундаж наслалт 76.2 жил

- 2020 онд хүйсийн харьцаа буюу 100 эмэгтэйд ногдох эрэгтэйчүүдийн тоо 96.5 болжээ. Хүн амын хүйсийн харьцааг насны бүлгээр авч үзвэл 0-28 насны бүлэгт 100 эмэгтэйд ногдох эрэгтэйчүүдийн эзлэх хувь илүү байгаа бол 34, түүнээс дээш насны бүлэгт эмэгтэйчүүдийн эзлэх хувь өндөр байна.

- Өрхийн тоо 2020 оны эцэст 908.7 мянга болсны 67.3 хувь нь хотод, 32.7 хувь нь хөдөө байгаа бөгөөд улсын дунджаар нэг өрхөд 3.6 хүн ногдож байна.

- Нийт өрхийн 70.7 хувь нь эрэгтэй өрхийн тэргүүлэгчтэй, 29.3хувь нь эмэгтэй өрхийн тэргүүлэгчтэй.

- Гэрлэлтээ бүртгүүлсэн хүний тоог насны бүлэг болон хүйсээр авч үзвэл нийт гэрлэлтээ бүртгүүлсэн эрэгтэйчүүдийн 88.2 хувь, эмэгтэйчүүдийн 87.7 хувь нь 20-39 насныхан байна.

--Манай улсын нийт хүн амын 1,585,952 эмэгтэйчүүд байна.

-Сонгуулийн насны эмэгтэйчүүдийн  сонгуульд оролцож 54% нь саналаа  өгч, 5 эмэгтэй тутмын 1 нь дээд боловсрол эзэмшиж, эмэгтэйчүүд амьдралынхаа хугацаанд 2-3 хүүхэд төрүүлж, 76 насалж байна.

/Эдгээр тоо баримтыг Хүн ам, орон сууцны 2020 оны ээлжит тооллогын дүнгийн тайлангаас авав/