Даатгалын салбарынхан “Тэрбум мод” үндэсний хөдөлгөөнд нэгдлээ

Ерөнхийлөгчийн тамгын газар, Санхүүгийн зохицуулах хороо, Байгаль орчин, аялал жуулчлалын яамнаас “Тэрбум мод” тарих үндэсний хөдөлгөөнд санхүүгийн салбарынхны оролцоог нэмэгдүүлэх, санал санаачилгыг өрнүүлэх зорилгоор даатгалын салбарын төлөөллүүдтэй энэ сарын 03-ны өдөр Төрийн ордонд уулзалт зохион байгуулсан. Уулзалтад Ерөнхийлөгчийн эдийн засгийн болон байгаль орчны зөвлөх, Ерөнхий сайдын байгаль орчны зөвлөх, Санхүүгийн зохицуулах хорооны удирдлага, газрын дарга нар, Байгаль орчны яамны ойн бодлогын газрын удирдлага болон Монголын даатгалын холбоо, Албан журмын даатгалын холбоо, Даатгалын жуучлагчдын холбоо, Монголын хөрөнгө, хохирол үнэлэгчдийн холбоо, ердийн даатгалын 15, урт хугацааны даатгал болон давхар даатгалын компанийн төлөөлөл оролцсон юм.

Энэ үеэр Монгол Улсын Ерөнхийлөгчийн Эдийн засгийн зөвлөх, Байгаль орчин, ногоон хөгжлийн зөвлөхөөс эх дэлхий, байгаль орчиндоо эзний ёсоор хандаж, цөлжилт, газрын доройтол,  шар шороон шуурга, уур амьсгалын өөрчлөлтийн эсрэг болон “Тэрбум мод” үндэсний хөдөлгөөнийг хэрэгжүүлэх стратегийн талаарх мэдээллийг танилцуулсан.

Уулзалтад оролцсон даатгалын салбарын төлөөллүүд мод тарихыг компанийн нийгмийн хариуцлагаас гадна ирээдүй хойч үедээ үлдээж буй өв хөрөнгө гэж үзэн идэвхтэй дэмжиж оролцохоо илэрхийлж, даатгалын ногоон сан байгуулах, нөөц сангийн тодорхой хувийг ногоон санхүүжилтэд байршуулах, ой хээрийн бүсийг албан журмын даатгалд хамруулах зэрэг санал санаачилгуудыг хэлж, үндэсний хөдөлгөөнд нэгдсэнээ илэрхийллээ.