Мөрийтэй тоглоом зохион байгуулсан 10 үйлдлийг илрүүлэн мөрдөн шалгах ажиллагаа явуулж байна

Эрүүгийн цагдаагийн албаны Зохион байгуулалттай гэмт бүлэг, хүн худалдаалах гэмт хэрэгтэй тэмцэх хэлтсээс нийслэл хотын нутаг дэвсгэрт хууль бус мөрийтэй тоглоом зохион байгуулсан 10 үйлдлийг илрүүлэн харьяа дүүрэг дэх цагдаагийн газар, хэлтэстэй хамтран мөрдөн шалгах ажиллагаа явуулж байна. 

Тухайлбал:

1. 2022 оны 01 дүгээр 06-ны өдөр БГД-ийн 5-р хороо ,,, байранд иргэн “Т” нь хууль бус мөрийтэй тоглоом зохион байгуулсан.
2. 2022 оны 01 дүгээр 08-ны өдөр СХД-ийн 32-р хороо ,,, худалдааны төвд иргэн Б нь хууль бус мөрийтэй тоглоом /покер/  зохион байгуулсан.
3. 2022 оны 01 дүгээр сарын 14-ны өдөр ХУД-ийн 11-р хороо ,,, байранд иргэн Б, Ц нар хууль бус мөрийтэй тоглоом зохион байгуулсан.
4. 2022 оны 01 дүгээр 22-ны өдөр БГД-ийн 12-р хороо ,,, байранд иргэн Г хууль бус мөрийтэй тоглоом зохион байгуулсан.
5. 2022 оны 01 дүгээр сарын 22-ны өдөр иргэн “Б” нь хууль бус мөрийтэй тоглоом зохион байгуулсан.
6. 2022 оны 01 дүгээр 26-ны өдөр БГД-ийн 14-р хороо ,,, байрны дэргэд байрлах объектод иргэн “Г” хууль бус мөрийтэй тоглоом зохион байгуулсан.
7. 2022 оны 02 дугаар сарын 13-ны өдөр иргэн “Г” хууль бус мөрийтэй тоглоом зохион байгуулсан.
8. 2022 оны 01 дүгээр сарын 19-ний өдөр БЗД-ийн 4-р хорооны нутаг дэвсгэрт иргэн “Х” хууль бус мөрийтэй тоглоом зохион байгуулсан.
9. 2022 оны 01 дүгээр сарын 29-ний өдөр БЗД-ийн 1-р хороо ,,, байранд иргэн “Б” хууль бус мөрийтэй тоглоом зохион байгуулсан.
10. 2022 оны 02 дугаар сарын 18-ны өдөр ХУД-ийн 11-р хороонд байрлах ресторанд иргэн “Г” хууль бус мөрийтэй тоглоом зохион байгуулсан үйлдэлд Эрүүгийн хуулийн тусгай ангийн 20.17 дугаар зүйлд зааснаар эрүүгийн хэрэг үүсгэж мөрдөн шалгах ажиллагаа явуулж байна.

Шалгалтын явцад тоглоомын газруудаас мөрийтэй тоглож байсан 51 иргэнийг Зөрчлийн тухай хуулийн 5.7 дугаар зүйлд зааснаар 5.100.000 /таван сая нэг зуун мянга/ төгрөгөөр торгожээ.

Мөн автомат тоглоомын ширээ 5, четон 1745, хөзөр 75, бэлнээр 19.954.000 /арван есөн сая есөн зуун тавин дөрвөн мянга/ төгрөг, компьютер 3 ширхэг зэрэг эд зүйлийг эд мөрийн баримт болон улсын орлого болгохоор хураан авсан байна.

Түүнчлэн мөрийтэй тоглож байсан иргэдийн дунд урьд өмнө удаа дараа ял шийтгэгдэж байсан болон цагдаагийн байгууллагаас эрэн сурвалжлагдсан этгээдүүд байсныг тогтоон холбогдох хууль журмын дагуу шалгалтын ажиллагааг явуулж байна.

Хууль бус мөрийтэй тоглоом зохион байгуулдаг этгээдүүд нь бусдын орон байрыг урт хугацаагаар түрээслэн мөрийтэй тоглоом болон хууль бус үйл ажиллагааг зохион байгуулдаг тул иргэд та бүхэн түрээслүүлсэн өөрсдийн эзэмшлийн орон сууц, объектуудад тогтмол хяналт тавьж, интернет банк болон банкны картаа бусдад ашиглуулахгүй байхыг Цагдаагийн байгууллагаас анхааруулж байна.

20.17 дугаар зүйл. Мөрийтэй тоглоом зохион байгуулах

/Энэ зүйлийг 2020 оны 01 дүгээр сарын 10-ны өдрийн хуулиар нэмсэн./

1. Олон нийтийн газар, эсхүл мэдээллийн технологи ашиглан ашиг олох зорилгоор шоо, хөзөр, бусад эд зүйл ашиглан үр дүнг нь урьдчилан төсөөлөх боломжгүй, аз туршиж тоглодог мөрийтэй тоглоом зохион байгуулсан бол дөрвөн зуун тавин нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.
2. Үр дүнг нь урьдчилан төсөөлөх боломжгүй, аз туршиж тоглодог хуулиар хориглосон мөрийтэй тоглоомын газар байгуулсан, эсхүл ажиллуулсан бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.