Түрүүлж дуугарсан хөхөөний ам хөлддөг гэдэгчлэн...

Ийм нэг үг бий. Аливаад бодлоггүй, хөнгөн хийсвэр хандахын хор уршгийг илэрхийлсэн утга эндээс уншигддаг.

Цахим орчныг анзаарч байхад ОХУ-ын Украинд явуулж байгаа цэргийн тусгай ажиллагаатай холбоотойгоор Монгол Улс байр сууриа илэрхийлсэнгүй гэх  зэмлэсэн өнгө аяс бүхий постууд явж байгаатай тааралдана. 

Харин Монголын парламентад суудалтай улс төрийн хоёр дахь хүчин гэддэг  АН-ынхан энэ талаар байр сууриа илэрхийлсэн ч ихэнх хүмүүсийн хувьд инээдэм ханиад болоод өнгөрөв бололтой.

Уг нь ардчилсан улс оронд байх л хэм хэмжээ. Гэхдээ АН-ын хувьд өнөөдөр Орос Украин байтугай өөрсдийнхөө хөл толгойг олохгүй төөрөлдчихөөд төрлөө олохгүй яваа хөөрхийс.

Энэ өнцгөөсөө л ингэж харагдаад хийсэн хэлсэн бүхэн нь  эцэстээ доог тохуу төдийгөөр илэрхийлэгддэг болчихоод байгаа юм.

Монгол Улсын хувьд Орос Украины асуудалд одоогоор албан ёсны байр сууриа илэрхийлээгүй байгаа. Энэ хоёр оронтой хэзээнээс л дотно харилцаатай явж ирсэн. Хэнийг нь гэх вэ гэдэг нь өөрөө бас хүнд асуудал.

Гадаад харилцааны сайд Б.Батцэцэг өчигдөр мэдээлэл өгөх үеэрээ энэ сэдвийг хөндсөн.  Тэрбээр "Украин, Оросын асуудалд манай улс анхааралтай ажиглаж байна. Хурцадмал байдлыг хурдан намжаах нь чухал гэсэн байр суурьтай байгаа. Шаардлагатай бол ҮАБЗ-тэй ярьж байгаад мэдэгдэл гаргана" гэлээ.

Хурцадмал байдлыг хурдан намжаах гэдэг нь дэлхий нийтийн хувьд түгээмэл байр  суурь болж байгаа нь тодорхой ч үүнийгээ хэрхэн илэрхийлэх вэ гэдэг нь улс төрчдийн ур чадварын асуудал байж мэдэх л юм.  Дэлхий хэдийгээр Монголын байр суурь мэдэгдлээр дутахгүй, бүр үгүйлэгдэхгүй  байж мэдэх ч бүрэн эрхт тусгаар улсын дуу хоолой гэдэг нь өөрөө том агуулга л даа.  

Гэхдээ мэдэгдэл гэдэг үг бүр нь үр дагавартай, хожмын өдөр хожил хохирлын аль  алиныг авчрах эрсдэлтэй гэдгийг тооцох учиртай.

Цаагуур чинь Өрнөдийнхний байр суурйг дагаж өширхөгчид,  Оросын үйлдлийг өмөөрөгчид гээд  янз янз л байр суурь явж байх шиг.

Түрүүлж дуугарсан хөхөөний ам хөлддөг гэдэгчлэн бусдыг, тэр дундаа урд хөршөө, хажууханд байгаа Казакстаны хандлага ямар байгааг харж ажиглаж байж албан ёсны мэдэгдэл, энэ тэрээ гаргах байлгүй дээ.

Б.Тулга