Хэрэгтэй цагт Хэн бэ гэдгээ харуулах чадвар, цагийн байдлыг үнэлэх мэдрэмж дипломат албаныханд дутлаа

Украины Харьков хотод Монголын 18 оюутан гацчихаад наашаа ч үгүй цаашаа ч үгүй болчхоод байна. Тус улсын хоёр дахь том хот болох Харьковт ширүүн тулаан болж байгаа болохоор тэндээс оюутнуудаа эрсдэлгүй татаж авна гэдэг хүндхэн сорилт гэдэг нь  тодорхой.  Харьков руу орох, гарах хөдөлгөөн бүрэн хаагдсан. Гэхдээ  ийм нөхцөл байдалд орохгүй байх боломж байсан уу гэвэл байсан. Цагийн байдлыг үнэлж, эрсдэлт нөхцөлийг мэдэрч чадаагүй нь манай гадаад харилцааныхны алдаа.

Дайн эхлэх нь зайлшгүй болчихлоо гэдгийг  дэлхийн улс орнуудын агентлагууд залхтал мэдээлж байсан, АНУ-ын Ерөнхийлөгч Оросын арми довтлох өдрийг анх хоёрдугаар сарын 16-ны өдрөөр нэрлэж байсан тэр эгзэгтэй өдрүүдэд эх орон нэгтнүүдээ эргүүлэн татах ажлыг шуурхайлан зохион байгуулах бүх талын боломж байсан нь лавтай.

Энэ бүхнийг эс тооцлоо гэхэд Ж.Байден дайн эхлэх хугацааг дараагийн долоо хоног гэж мэдэгдээд  бид энэ мэдээнд итгэх шалтгаан байгаа гэдгээ хэлж байсныг бас анзаарсангүй өнгөрчихөв үү.  Цаг хугацааны хувьд яг л түүний хэлснээр үйл явдал өрнөсөн. Тэгээд цэргийн ажиллагаа эхэлсэн өдөр  ниргэсэн хойно нь хашгарав гэгчээр Засгийн газар яаран сандран хуралдаж шийдвэр гаргасан ч энэ нь үндсэндээ оройтсон байсан гэдгийг одоогийн нөхцөл байдал хэлж байна.  

Хэн бэ гэдгээ хэрэгтэй цагт харуулах чадвар чансаа, цагийн байдлыг үнэлэх мэдрэмж манай дипломат албаныханд дутлаа. Тэр дундаа улс орноо гадаад улсад төлөөлөн сууж  байгаа элчин сайд хүн дипломат ур чадвар, ажил хэргийн хариуцлага, хандлагын учир дутагдалтай байдлаа тодоос тод харуулж байх жишээний.

Өөр улсууд оюутнуудаа аваад байх шиг байна аа гэж асуухад  элчин сайд Б.Дорж гэдэг хүн "Би юу хийх ёстой юм бэ, надаар юу хийлгэх гээд байгаа юм бэ" гэж сөргүүлэн асууж байгаа дуу хоолойг иргэд сонссон байх.  Ийм нөхцөлд юу хийхээ мэдэхгүй хүнийг Элчин сайдаар томилсон байна.    Хашигдчихаад байгаа оюутнууддаа тусалж чадахгүй байгаа хирнээ бүхий л талаар дэмжиж тусалж байгаа мэтээр  худал мэдэгдэл хийснийг нь тэнд байгаа оюутны төлөөлөл өчигдөр  хэлж байна билээ.  Бодит байдал гэвэл тэнд байгаа 18 оюутан маань хоёр газар хуваагдан метро болон байрныхаа хонгилд  хорогдож байгаа аж. Хоол унд, хэрэглээний зардал, биологийн хэрэгцээгээ хангаж чадахгүй, сэтгэл санааны түгшүүр айдас дунд байна. Хүнд нөхцөлд хүүхдүүд тав хонож байхад бусад улс орон  оюутнуудаа татаж авахаар шуурхай ажиллаж байгаа гэдгийг эцэг эхийн төлөөлөл мэдэгдэж байгаа юм.

Гадаад харилцааны яамны гадаа  Украинд  байгаа оюутнуудын эцэг эх энэ өдрүүдэд эсэргүүцлээ илэрхийлсээр байгаа. Харин тус  яамны Төрийн нарийн бичгийн дарга Н.Анхбаяр  өчигдрийнхөө ээлжит мэдээллийн үеэр  “Олон улсын шилжилт хөдөлгөөний байгууллагатай холбоотой ажиллаж байгаа. Тусламж үзүүлэх болон аюултай бүсээс хэрхэн аюулгүй гаргаж авах вэ гэдэг чиглэлээр хамтарч ажиллаж байна” гэсэн үгээр тайвшруулах “тариа” хийв.

Тэрбээр энэ үеэрээ мөн  Иргэдийг татан авахтай холбоотойгоор холбогдох албан тушаалтнуудад хариуцлага тооцно гэдгээ мэдэгдлээ.

Гадаад харилцааны  яамны дотоод мөн чанар энэ мэт хариуцлагагүй байдлаараа  танигдаж байгаа нь энэ.

М.Нэргүй