Барилга угсралт, их засварын ажлын 97.7 хувийг дотоодын байгууллага гүйцэтгэжээ

Барилга угсралт, их засварын ажил 2021 оны урьдчилсан гүйцэтгэлээр 4.5 их наяд төгрөг болж, 4.4 (97.7 хувь) их наяд төгрөгийн ажлыг дотоодын, 104.6 (2.3 хувь) тэрбум төгрөгийн ажлыг гадаадын барилгын байгууллага гүйцэтгэв.

Ийнхүү ноднингийнхоос 695.6 (13.4 хувь) тэрбум төгрөгөөр багасахад дотоодын барилгын байгууллагын гүйцэтгэсэн барилга угсралт, их засварын ажил 685.3 (13.5 хувь) тэрбум төгрөгөөр буурсан нь нөлөөлжээ.

Дотоодын барилгын байгууллагаас хувийн байгууллагын гүйцэтгэсэн барилга угсралт, их засварын ажил 4.1 их наяд төгрөг болж, өмнөх оныхоос 403.8 (9 хувь) тэрбум, төрийн байгууллагын гүйцэтгэсэн барилга угсралт, их засварын ажил 287.8 тэрбум төгрөг болж, өмнөх оныхоос 251.3 (46.6 хувь) тэрбум төгрөгөөр, гадаадтай хамтарсан байгууллагын барилга угсралт, их засварын ажил 48.1 тэрбум төгрөг болж, 30.2 (38.5 хувь) тэрбум төгрөгөөр багаслаа.

Барилга угсралт, их засварын ажлын 35.2 хувийг орон сууцны барилга, 32.6 хувийг орон сууцны бус барилга, 29.4 хувийг инженерийн барилга, байгууламж, 2.8 хувийг их засвар эзэлж, өмнөх оныхоос орон сууцны барилгын ажлын эзлэх хувь 1.8 нэгж хувиар ихэссэн бол орон сууцны бус барилгын эзлэх хувь 1.5, инженерийн барилга, байгууламжийнх 0.2 нэгж хувиар  багассан байна.

Орон сууцны бус барилгын ажлын гүйцэтгэл 2021 оны урьдчилсан гүйцэтгэлээр 1.5 их наяд төгрөг болж, өмнөх оныхоос 306.5 (17.2 хувь) тэрбум төгрөгөөр багаслаа. Үүнд, сургууль, соёлын барилгынх 176 (34.4 хувь) тэрбум, бусад барилгынх 114 (35.5 хувь) тэрбум, эмнэлгийн барилгынх 34.7 (38.6 хувь) тэрбум, худалдаа, үйлчилгээний барилгынх 20.2 (13.9 хувь) тэрбум төгрөгөөр багассан нь нөлөөлжээ.

Улаанбаатар хотод 2021 оны урьдчилсан гүйцэтгэлээр 1.8 их наяд төгрөгийн барилга угсралт, их засварын ажил хийгдсэн нь улсын дүнд 42 хувийг эзэлж, өмнөх оныхоос 3.9 нэгж хувиар багасав. Дотоодын барилгын байгууллагын гүйцэтгэсэн барилга угсралт, их засварын ажил 2021 оны урьдчилсан гүйцэтгэлээр Өмнөговь аймагт 1.4 их наяд, Дорноговь аймагт 284.3 тэрбум төгрөг болж, энэ нь аймгуудын барилга угсралтын ажлын 64.3 хувийг эзэлж байна.

Эдгээр аймгийн нутаг дэвсгэрт төмөр зам, газрын тосны үйлдвэрийг дагасан барилга угсралтын ажил эрчимжиж байна. Өнгөрсөн онд ашиглалтад оруулсан барилга угсралт, их засварын ажил 1.1 их наяд төгрөг болж, өмнөх оныхоос 1.2 (53.7 хувь) их наяд төгрөгөөр багассаныг Үндэсний статистикийн хороо мэдээлэв. Үүнд, орон сууцны барилга 537.8 (50.5 хувь) тэрбум, орон сууцны бус барилга 442.1 (64.5 хувь) тэрбум, инженерийн барилга, байгууламж 202.5 (47.4 хувь) тэрбум, их засварын ажил 58.6 (43.3 хувь) тэрбум төгрөгөөр багассан аж.