ХӨГЖЛИЙН БАНК:ТУЗ-ийн "гэмгүй" гишүүн С.Магнайсүрэн 

Монгол Улсын Ерөнхий сайд Л.Оюун-Эрдэнэ Хөгжлийн банкны удирдлагуудтай уулзаж, тус банкны Төлөөлөн удирдах зөвлөлийг 100 хувь өөрчилж чөлөөлөхийг үүрэгдлээ. Энэ  бол хариуцлага тооцох  “бай”-гаа оносон шийдэл мөн үү гэвэл мөн.  Чанаргүй зээлийн гол буруутнаар Хөгжлийн банкны  тухайн үеийн захирал нар нэрлэгдэж байгаа. Энэ ч зүй хэрэг байх.   Гэхдээ    ТУЗ-ийн  шийдвэрийг гүйцэтгэх захирал биелүүлэх үүрэгтэй. Учир нь  зээл олгох шийдвэрийг ТУЗ гаргадаг. Энэ өнцгөөс нь харвал барьцаа хөрөнгөгүй шахам том том зээл олгох шийдвэр  гаргасан  ТУЗ-ийн гишүүдийг ч зайлшгүй шалгах учиртай гэсэн агуулга харагдана.  Чөлөөлөгдөж байгаа Хөгжлийн банкны Төлөөлөн удирдах зөвлөл есөн гишүүнтэй, тэдгээрийн дөрөв нь хараат бус гишүүн бол бусад нь яамдын Төрийн бичгийн дарга голдуу албан тушаалтнууд байна. Тэдний нэг нь БХБ-ын яамны Төрийн нарийн бичгийн дарга С.Магнайсүрэн юм.

Төрийн нарийн бичгийн даргаар 8 жил орчим ажиллаж байгаа “дархлагдсан” дарга нарын нэг. Тэрбээр 2018 оны сүүлчээс эхлэн бараг 4 жил шахмын хугацаанд Хөгжлийн банкны ТУЗ-ын гишүүнээр тасралтгүй ажиллаж ирсэн байдаг. Тэр ч утгаараа банкны чанаргүй зээлийн олголтод “магнайлж” байсан гэж хардах шалтгаан бий. Ямартай ч  цаг хугацаа хийгээд үүрэг хариуцлагын хүрээнд авч үзвэл тус банкны гавьяа, гайг нь яалт ч үгүй хуваалцах ёстой хүний нэг нь тэр мөн. Тиймээс ТУЗ-ийн гишүүн байтугай одоо эрхэлж буй албан тушаалтай нь хариуцлага тооцсон ч буруутгах аргагүй. 

...Учир шалтгааны учиг даган хөвөрч буй үйл явдлын өрнөл хандлага дунд нэг анхаарал татах кейс бий. Тэр нь Хөгжлийн банкны чанаргүй зээл олны хараанд өртөж, хариуцлага тооцох яриа оргил үедээ хөвөрч байсан тэр үеэр буюу Цагаан сарын дараахан  “Макс рөүд” компани 17 тэрбум төгрөгийн зээлээ ердөө ганцхан өдрийн дотор буцаан төлсөн явдал.  Сайн хэрэг, бараг баяр хүргэмээр.

Гэхдээ “Хэрэв...” гэсэн асуулт эргэлзээ зэрэгцэн хөвөрнө. Хэрэв Хөгжлийн банкны асуудал өндрөө аваагүй бол 17 тэрбум төгрөг байсаар атал  зээлээ төлөхгүй, цагийн байдлыг ажиглаад цаанаа бодол гүйлгэсэн шиг төрийн цалгардал, түмний мэдээлэлгүй байдлыг харзнасан шиг явах байсан уу. Иргэд ийм бодол саналыг  дээрхи зээлийн эргэн төлөлтийн араас илэрхийлж байсныг уншигчид санаж байгаа байх.  

“Макс рөүд” бол Макс группийг эзэмшигч нь Д.Ганбаатарын компани. Хөгжлийн банкны ТУЗ-ийн гишүүн С.Магнайсүрэн Д.Ганбаатар, Д.Цэрэнжигмэд  нар нэг нутгийн ханагарууд. Д.Цэрэнжигмэд Монголын барилгын үндэсний ассоциацийн Ерөнхийлөгчийн хувьд С.Магнайсүрэн тэр хоёр ажил төрлийн хамааралтай хүмүүс. Түүнчлэн хэн хэн нь нэр цолтой уяачид, морины зүтгэлтэн гэдгээрээ бүр ч ойр дотно. Говь-Алтай аймгийн “Алтайн хүлэг” МСУХ-ны  тэргүүнээр  С.Магнайсүрэн ажилладаг.  

Ийм хамаарал, хэлхээ холбоотой хүмүүс. Энэ өнцгөөсөө С.Магнайсүрэн “Макс рөүд”-ийн  18 тэрбум төгрөгийн зээлийг төвөг чирэгдэлгүй авахад нөлөөлөөгүй гэх үндэслэл байхгүй. Хэрэв ийм хамаарал нөлөөлөл байгаа бол зөвхөн ТУЗ-ийн гишүүнээс чөлөөлөөд зогсохгүй яамны Төрийн бичгийн дарга гэсэн  албан тушаалтай нь хариуцлага ярих үндэслэл болно.