Цар тахлыг зогсооход хамтран ажиллахыг уриалжээ

Дэлхийн эрүүл мэндийн байгууллагын тэргүүн Тедрос Адханом Гебрейесус “COVID-19” цар тахлыг зогсооход уялдаа холбоотойгоор хамтран ажиллахыг улс орнуудад уриалжээ. 

Германы зүүн нутгийн Мюнхен хотноо болж буй Мюнхений аюулгүй байдлын бага хурлын “Цар тахлыг даван туулах арга замыг олох нь” хэлэлцүүлгийн үеэр тэрбээр ийнхүү хэлсэн байна. 

Т.Гебрейесус вакцинжуулалтын түвшин өндөр байгаа зарим оронд цар тахал дууссан гэх яриаг “аюултай” хэмээн тодорхойлоод, “омикрон” хувилбарын эрүүл мэндэд учруулах эрсдэл бага гэх мэдээллийг үгүйсгэжээ. 

Түүний хэлснээр, урьдчилан сэргийлэх боломжтой, эмчлэгддэг өвчний улмаас долоо хоног тутам 70 мянган хүн нас барж, Африкийн хүн амын 83 хувь нь “COVID-19”-ийн вакцины эхний тунд хамрагдаагүй байгаагаас гадна дэлхий даяарх эмнэлгүүдийн ачаалал их хэвээр байна. 

“Бид “COVID-19” цар тахлыг энэ онд дуусгавар болгож чадна. Бидэнд шаардлагатай хэрэгслүүд, мэдлэг туршлага байна” гэдгийг ДЭМБ-ын тэргүүн тодотгоод, “COVID-19”-ийн вакцин, оношлуур, эмчилгээ, хувийн хамгааллын хэрэгслийн хүртээмжийг нэмэгдүүлэх “ACT” хөтөлбөрийг яаралтай 16 тэрбум ам.доллароор санхүүжүүлэхийг бүх улс оронд уриалжээ. Үүнийг эдийн засгийн хямрал дахин нэг жил үргэлжлэх өртөгтэй харьцуулахад маш бага болохыг тэрбээр онцолсон байна. 

“COVID-19”-ийн оношлуур, эмчилгээ, вакцины хөгжүүлэлтийг түргэтгэж, хүртээмжийг нэмэгдүүлэх зорилго бүхий “ACT” хөтөлбөрийг 2020 оны дөрөвдүгээр сараас буюу “COVID-19” халдварыг цар тахал хэмээн албан ёсоор зарласнаас хэдхэн долоо хоногийн дараачаас хэрэгжүүлж эхэлсэн юм. Дэлхий дахинд “COVID-19”-ийн вакциныг тэгш хуваарилах зорилго бүхий “COVAX” санаачилга нь энэхүү хөтөлбөрийн дөрвөн тулгуурын нэг юм.