Шинжилгээнд өгсөн гэгдэх 10 чингэлэг тахианы махны дээж Төв лабораторид ирээгүй байхад шинжилгээний хариу гарчихжээ

Стандартын шаардлага хангаагүй чингэлэгээр нэмэх хэмд тээвэрлэгдэж ирсэн тахианы махны асуудлаар тал үнэн сурвалжлагаараа манай сайт мэдээлж байсан. Тэгвэл 420 тонн тахианы махыг Улаанбаатар хотод лабораторийн шинжилгээнд шинжлүүлж байна гэдэг тайлбарыг Хилийн мэргэжлийн хяналтын газрын экспорт, импорт, хилийн хорио цээрийн хяналтын газрын дарга Г.Батмөнх мэдэгдэж байсан. Түүний мэдэгдсэнээр шинжилгээний хариу өнгөрсөн 7 хоногт гарсан байх учиртай. Харин 2-р сарын 14 буюу өнөөдөр өглөө түүнтэй утсаар ярихад дараах хариултыг өглөө .

Хилийн мэргэжлийн хяналтын газрын экспорт, импорт, хилийн хорио цээрийн хяналтын газрын дарга Г.Батмөнх: “Бид тухайн импортлогдсон тахианы махыг лабораторид шинжлүүлж байгаа. Импортлосон компаниудын эхний гурван компанийн тахианы мах хэвийн гэсэн дүн гарлаа.”

Түүний тухайд шинжилгээний хариу эхнээсээ хэвийн гарлаа гэдэг тайлбарыг өглөө. Харин бид шинжилгээ хийж байгаа гэгдэх лабораторид очиж тодруулахад манай байгууллагад 420 тонн тахианы махны дээж ирээгүй. Манайх шинжилгээ хийгээгүй гэсэн юм.

Мал эмнэлэг ариун цэврийн төв лабораторийн албаны дарга Д.Ганцэцэг: “Манай лабораторид тухайн тахианы талаар мэдээлэл байхгүй байна. Одоогоор улсын мал эмнэлэг ариун цэврийн лабораторид тус 420 тонн тахианы махны дээж шинжлүүлэхээр огт ирээгүй гэж ойлгож болно. Ер нь бол нэмэх хэмд олон хоног зориулалтын бусаар тээвэрлэсэн бол тахианы махны чанарт өөрчлөлт орно.” гэж тайлбар өгсөн юм.

Угтаа бол зориулалтын тээврийн хэрэгслээр тээвэрлэгдэж ирсэн бол хилээр нэвтрүүлэхгүй байх буцаах үүрэгтэй.  Гэтэл ийнхүү сар шинийн баярын өдрөөр бүх нийтийн амралтын өдрөөр далимдуулан гэрийн хойд хаяагаар шургуулна гэдэг шиг хүчээр оруулж ирчихээд, шинжилгээ авч байгаа, шинжилгээний хариу хэвийн гарлаа гэх зэрэг зөрүүтэй тайлбарыг Хилийн мэргэжлийн хяналтын газраас өгч худалдаанд гаргах гэж байгаа нь шударга явдал уу. Үүний цаана чиг үүргийн байгууллага буюу Хилийн мэргэжлийн хяналтын газрын албан хаагчид шат шатандаа монголчуудын эрүүл мэндээр дэнчин тавьж ханцуйлцвуу гэсэн хардлага улам бүр нэмэгдлээ .

 Б.Сугар