Владимир Зеленский АНУ-ын Ерөнхийлөгч Жо Байденыг Украинд айлчлахыг урив

Украины Ерөнхийлөгч Владимир Зеленский АНУ-ын Ерөнхийлөгч Жо Байденд хандан Украинд айлчлахыг урилаа. АНУ Украины газар нутгийн халдашгүй байдал, тусгаар тогтнолыг бүрэн дэмжихээ илэрхийлээд байгаа юм.

Жо Байдены хувьд бямба гарагт ОХУ-ын Ерөнхийлөгч Владимир Путинтэй Украины асуудлаар утсаар цаг гаруй ярилцсан юм. Энэ үеэр Жо Байден ОХУ Украинд халдсан тохиолдолд ноцтой үр дагавар авчрах хатуу арга хэмжээнүүд авахаа дахин анхааруулсан байна. Мөн Жо Байден хурцадмал байдлыг намжаахын тулд дипломат шийдэл олоход бэлэн байгааг онцолжээ.

Үүнээс гадна АНУ-ын Төрийн нарийн бичгийн дарга Энтони Блинкен ОХУ Олимпын наадмын үеэр Украинд халдаж магадгүй байгааг санууллаа. Өөрөөр хэлбэл Украины хилийн ойролцоо ОХУ цэргийн хүчээ төвлөрүүлсэн асуудал хамгийн эгзэгтэй долоо хоног эхэлж байж магадгүй байна.

АНУ-ын Төрийн нарийн бичгийн дарга Энтони Блинкен “
Энгийнээр тайлбарлахад ОХУ Украины хил орчимд цэргийн хүчээ улам нэмэгдүүлсээр байгаа талаар мэдээллүүд ирж байна. Урьд нь хэлж байсанчлан цэргийн ажиллагаа хэзээ ч эхэлж магадгүй шилжилтийн үед ирсэн. Олимпын наадмын үеэр ч халдаж магадгүй. АНУ Элчин сайдын яамны ажилтнуудаа эргүүлэн татсаар байна. Энэ үйл явц цаашид ч үргэлжлэх болно. Мөн Украинд буй АНУ-ын иргэдэд тус улсыг яаралтай орхих шаардлагатай гэдгийг маш тодорхой тайлбарласан” гэж мэдэгдлээ.