Л.Оюун-Эрдэнэ: Хөгжлийн банкны чанаргүй зээлийн ард 15 хүрэхгүй хүн бий. Засгийн газар хатуу арга хэмжээ авна

Монгол Улсын Ерөнхий сайд Л.Оюун-Эрдэнэ Хөгжлийн банктай холбоотой асуудлаар байр сууриа илэрхийллээ. Тэрбээр “Хөгжлийн банкны чанаргүй зээлийн ангилалд багтах 1.3 их наяд төгрөгийн зээлийн ард 15 хүрэхгүй хүн бий. Эрүүгийн хуулийн дагуу энэ асуудлыг шалгаж хариуцлага тооцох хэрэгтэй” гэв.

Мөн Засгийн газар Хөгжлийн банкны зээлийг хоёр хувааж авч үзэхээ илэрхийллээ. Тодруулбал Хөгжлийн банкыг татан буулгахгүй эсвэл дампууруулахгүй. Цаашид Хөгжлийн банкны үйл ажиллагааг тодорхой болгоно. Өнгөрсөн хугацаанд Хөгжлийн банк арилжааны банк ч юм шиг, ББСБ ч юм шиг ажиллаж ирсэн. Тиймээс экспортыг дэмждэг Эксим банкны загвараар ажиллуулна. Аж ахуйн нэгжүүдийн зээлийг Засгийн газар төлөхгүй гэдгийг мэдэгдлээ.

Хөгжлийн банкнаас авсан зээлээ зориулалтын дагуу ашигласан аж ахуйн нэгжүүдийг хэвийн зээлдэгч гэж үзнэ. Харин улс төрийн нөлөөлөлд автаж, зээлээ зориулалтын бусаар зарцуулсан, Хөгжлийн банкны удирдлагуудад нөлөөлсөн нөхдүүдэд Засгийн газар хуулийн дагуу хатуу арга хэмжээ авна гэдгийг Ерөнхий сайд хэллээ.

Засгийн газраас УЕПГ-т Хөгжлийн банкны зээлийн асуудлыг шалгаж хөөн хэлэлцэх хугацаа дууссан гэдэг асуудлыг эргэн харж мөнгө угаах гэмт хэрэг ард нь байсан уу гэдгийг тогтоолгохоор хандсан аж.

Г.Жүгдэр