Л.Оюун-Эрдэнэ: Өндөржүүлсэн бэлэн байдлын "улбар шар" түвшинг "шар" түвшинд шилжүүлж байна

Засгийн газар өнөөдөр ээлжит бусаар хуралдсан ба Монгол Улсын Ерөнхий сайд Л.Оюун-Эрдэнэ мэдээлэл хийж байна.

Ерөнхий Сайд Л.Оюун-Эрдэнэ: "Хуралдаанаар гамшгаас хамгаалах өндөржүүлсэн бэлэн байдлын "улбар шар" түвшинг "шар" түвшинд буулгах асуудлыг хэлэлцлээ.  "Шар" түвшинд шилжсэнээр аж ахуйн нэгж байгууллагад тавьдаг хязгаарлалтыг сулруулна. Тухайлбал, одоо урлаг, спортын үйл ажиллагааг танхимын 50 хувийн дүүргэлттэй зохион байгуулж байгаа бол "шар" түвшинд хязгаарлалт тогтоохгүй юм.

Монголын төр захиргааны байгууллага, хувийн хэвшил, аялал жуулчлалын байгууллага, жуулчдыг саадгүй хүрэлцэн ирэхэд бид хамтдаа хичээнгүйлэн ажиллах болно. Монгол Улс 2020 оны 11-р сараас эхлэн нийт долоон удаагийн хөл хорионд 79 хоногийг өнгөрөөсөн, мөн улаан, улбар шар буюу гамшгаас хамгаалах өндөржүүлсэн бэлэн байдалд байлаа.

Бид хоёр жилийн дараа ийнхүү шар түвшинд шилжиж байгаа ч халдвараас өөрийгөө болон бусдыг хамгаалах хариуцлагаа ухамсарлана хэмээн итгэж байна. Цар тахлын хугацаанд алдсан боломжоо нөхөх байр суурин дээрээ хатуу зогсох болно. Хамтдаа хичээж цар тахлыг даван, эдийн засгаа сэргээнэ гэдэгтээ итгэлтэй байна" гэлээ.

 И.Шинэбат