АНУ-ын Ерөнхийлөгч тус улсын иргэдийг Украинаас гарахыг уриалав

АНУ-ын Ерөнхийлөгч Жо Байден NBC телевизэд өгсөн ярилцлагадаа тус улсын иргэд Украиныг нэн даруй орхих ёстой гэж мэдэгджээ.

Украинаас нүүлгэн шилжүүлэх тухайд 
Байден Украинд байдал хурцдаж болзошгүй тул америкчуудыг  Украиныг  яаралтай орхихыг уриалав.
"Энэ нь террорист байгууллагатай харьцахтай адил зүйл биш юм. Бид дэлхийн хамгийн том армитай нүүр тулах болно. Энэ бол шал өөр нөхцөл байдал бөгөөд бүх зүйл хурдан өрнөдөг" хэмээн Жо Байден ярьжээ. 
Өмнө нь АНУ-ын Төрийн департамент ийм мэдэгдлийг хийж байсан бөгөөд америкчуудыг нэн даруй  Украиныг орхин гарахыг зөвлөсөн юм. Тэд  ОХУ-ын зүгээс цэргийн довтолгооны аюул нэмэгдэж, мөн COVID-19 тахлын улмаас тус бүгд найрамдах улсад зорчихгүй байхыг зөвлөжээ.

1-р сарын 26-нд Украин дахь АНУ-ын Элчин сайдын яам тус улсад байгаа иргэдээ  гарах талаар бодохыг уриалав. Үүнээс гадна Канадын эрх баригчид болон Австралийн Ерөнхий сайд Скотт Моррисон Украиныг орхин гарахыг мөн иргэддээ хандан уриалсан юм.  Үүнийг аль болох хурдан хийх шаардлагатайг хоёр улсын удирдлага мэдэгджээ.

Украинд цэрэг оруулах тухайд
Байден мөн ярилцлагадаа Америкийн цэргийг Украин руу явуулахаас татгалзсанаа тайлбарлав. Энэ арга хэмжээ нь дэлхийн шинэ дайныг өдөөх болно гэж  санаа зовж байна гэжээ.  Өмнө нь АНУ-ын Ерөнхийлөгч асан Дональд Трамп Байденыг олон улсын мөргөлдөөн дэгдээж байна гэж буруутгаж байв.

АНУ-ын зэвсэгт хүчнийг ямар ч тохиолдолд Украин руу илгээхгүй гэж Америкийн удирдагч нэмж хэлэв. АНУ болон НАТО-гийн цэргийн хүчийг Украинд байрлуулах бодолгүй байна гэж Байден өмнө нь мэдэгдэж байсан юм.

Үүний зэрэгцээ хоёрдугаар сарын 7-нд Цагаан ордон АНУ-ын цэргийг Европ руу илгээх талаар тайлбар хийж, ийм боломж байгааг хүлээн зөвшөөрч байв. Хэвлэлийн төлөөлөгч Жен Псаки энэ талаар хэлэх зүйл байхгүй гэж мэдэгдсэн ч "АНУ ийм алхам хийх боломжийг нээлттэй үлдээж байна" гэж онцолжээ.

Нэгдүгээр сарын сүүлчээр АНУ Зүүн Европ болон НАТО-гийн орнууд руу цэргээ шилжүүлэх бодолтой байгаа гэсэн мэдээлэл гарсан. Байден Европ руу илгээхийг хүсч буй цэргийнхээ тооны талаар "Тийм олон биш" гэж тайлбарлаж байсан удаатай.

Украинд үзүүлэх цэргийн тусламж 

Нэгдүгээр сарын 25-нд Украин Америкийн зэвсэг бүхий 45 онгоц ирснийг мэдэгдсэн юм. Цэргийн тусламжийн нийт нийлүүлэлтийн хэмжээ 200 сая ам.долларт хүрнэ гэдгийг мөн  хэлсэн. Америкийн зэвсэг бүхий найм дахь нисэх онгоц 2-р сарын 5-нд Киевт ирэв. Одоогийн байдлаар АНУ Украинд  батлан ​​хамгаалах  зориулалт бүхий 650 гаруй тонн хэрэгсэл нийлүүлээд байна.

Хоёрдугаар сарын 4-нд Украины Гадаад хэргийн сайд Дмитрий Кулеба, АНУ-ын Төрийн нарийн бичгийн дарга Энтони Блинкен нар Оросыг "хязгаарлах" стратегийн талаар ярилцав. Кулеба  "урьд өмнө байгаагүй" тусламж үзүүлсэнд Америкийн талд талархал илэрхийлж, Орос улс Нормандын форматын хүрээнд "бүтээлч байр суурь"  гаргана гэдэгт найдаж байгаагаа илэрхийлжээ.

"Нормандын  формат"
Хоёрдугаар сарын 11-ний шөнө Нормандын форматын хүрээнд Герман, Орос, Украин, Францын хэлэлцээр Берлинд өндөрлөв. Энэ хэлэлцээр есөн цаг үргэлжилсэн бөгөөд ямар ч үр дүнд хүрсэнгүй гэж ОХУ-ын Ерөнхийлөгчийн тамгын газрын орлогч дарга Дмитрий Козак мэдэгдэв. Украин Донбассын мөргөлдөөнийг зохицуулах талаарх санал зөрөлдөөнийг даван туулахаас татгалзаж, хэлэлцээрт хатуу байр суурь баримталсан юм.

Украины ерөнхийлөгч Владимир Зеленскийн Тамгын газрын дарга Андрей Ермак "Нормандын дөрвөлийн дараагийн уулзалтыг зохион байгуулах сонирхолтой байгаа ч хэлэлцээрийн огноо, цаг нь одоогоор тодорхойгүй байна" гэжээ.