"Монголын залуучуудын холбоо" МАН-ын дэргэдэх НАМЗХ-ийн салбар хороо болсон уу

 Цагийн сайханд гэдэг шиг цагтаа уулыг эргүүлж усыг шуугиулж явсан байгууллагын удам судар нь Монголын Залуучуудын холбоо  юм. Тэр цагт Монголын залуучууд энэ байгууллагын гишүүн гэдгээрээ гангардаг байв. Одооных  шиг ийм намын хавсарга аятай саармагжсан, салж сарнисан  байгууллага байсангүй. Дуугарвал дуу нэг, дугтарвал хүч нэг тийм  нэгдмэл цул хүчин байлаа.  Харин одоо...

МХЗЭ гэж байсан тэр буурин дээр Монголын залуучуудын холбоо гэдэг төрийн бус байгууллага  төвхнөсөн. Харин тэр цагаас хойш мөнөөх эрч хүч, тэмүүлэл дүүрэн байгууллагын дүр зураг зугуухан бүдгэрч эдүгээ бүр мартагджээ.

Монголын нийгэмд залуучуудын байгууллагын дуу хоолой, манлайлал үгүйлэгдээд удлаа. Албан тушаалын хэрүүл, байр савандаа эзэн суух далд хүсэл, улс төрийн нам бараадсан амбиц л залуучуудын байгууллагын саарал байшингаас байн байн дуулдаж, эрхбиш энэ байгууллага оршин тогтнож байгаа  гэдгийг нь мэдрүүлдэг болжээ. Бусдаар бол мартагдаж, залуу үеийнхний ой тойноос холдсоор байна.

Монголын залуучуудын холбоо эх орныхоо залуу үеийг эгнээндээ нэгтгэж,  дуу хоолой, нийгмийн манлайлал, залуу насны эрч хүч, хүсэл зориг чухамдаа эндээс л бургилан ундарч баймаар. Гэвч энэ холбооны урагшгүй үйл  ажиллагаанаас болж Монголын  залуучууд салж сарниж, улс төрийн нам бараадахыг илүүд үздэг болсон. Өөрөөр хэлбэл залуу үеийнхнийхээ үзэл бодол, үнэт зүйлсийг  улс төрийн намуудад булаалгачихсан гэсэн үг. Үүний нотолгоо нь намуудын дэргэдэх залуучуудын байгууллага. Монголын залуучуудын төв байгууллага гэсэн том агуулга нь алдагдаж,  намын дэргэдэх залуучуудын байгууллагуудаас ч дор үнэлэмжтэй болсон гунигтай  зураглал нь энэ.

Залуучуудаа уриалан дуудаж, эх орны бүтээн байгуулалт, шударга ёсны төлөө  дуу хоолойгоо нэгтгэж байх учиртай тус холбоо ичээнд байгаа мэт чимээ алдарч, байрны түрээсийн мөнгөөрөө амь амьжиргаагаа залгуулаад тулгаа тойрон хэмлэлдэж байхыг илүүд үздэг  болсон мэт.

Ингэхдээ улс төрийн намын нөмөр нөөлөгт хавчуулагдахыг илүүд үздэг болсон бололтой юм. МЗХ-ны өнөөгийн  явдал мөр, хандлага  зүг чигийг нь анзаарвал Ардын намын дэргэдэх НАМЗХ-ны хувилсан дүр шиг харагдах болжээ.

Залуучуудын байгууллагаар дамжин улс төр рүү том үсрэлт хийх хожмын тооцоо байдаг биз. Залуучуудаа нэгтгэж нягтруулах учиртай  холбоо маань ингэж залуусаа улс төржүүлж, улмаар үзэл бодлоор нь талцуулан эв хагалж, эе эвдэх шалтгаан болчих вий гэсэн болгоомжлол байна. Энэ янзаараа бол тус холбоо   тэрүүхэн тэндээ улс төрийн хор найруулагчдын бүлэглэл болон хувирч мэдэх юм. 

Хийж байгаа томилгооноосоо хүртэл нэг л биш харагдаад байна.  Өчигдөр гэхэд л МЗХ-ны Ерөнхийлөгч О.Гэрэлт-Од Баянзүрх дүүргийн ИТХ-ын төлөөлөгч асан  Б.Дэмбэрэлийг  зөвлөхөөрөө томилж олны нүдийг орой дээрээ гаргаж байгаа харагдав.  “Миний дүүргийн тэнгэр цэнхэр”, “Баянзүрх дүүргийнхээ хүүхэд багачуудад зориулж ном уншууллаа” зэрэг пост, эрүүл эсэхэд нь эргэлзмээр үйлдлээр нь хүмүүс Б.Дэмбэрэлийг сайн мэднэ.

МЗХ Монголынхоо залуучуудыг нэгтгэх байтугай удирдлагууд нь өөр хоорондоо байшин барилгаа тойрон хэрэлддэг гэлцэх юм билээ.  Энэ мэт хэрүүл уруул хэзээнээсээ байсаар ирсэн архаг хууч.  Ямар сайндаа л хэдэн жилийн өмнө тус байгууллагын  90 жилийн ойн баярын хуралдаа хэсэг залуус  “Нойрноосоо хэзээ сэрэх вэ” гэсэн лоозонтой очиж байв гэж.  Өнгөрөгч намар  гэхэд л тус Удирдах хорооны нарийн бичгийн дарга Г.Батбаатар гэгч залуу О.Гэрэлт-Одыгоо огцруулна гээд хэсэгтээ л дэвж шавсан юм даг.  

Ингэж өөр хоорондоо өширхөж хэмлэлдсэн хүмүүс Монголын залуучуудын төлөө юм хийнэ гэж хүлээвэл эндүүрэл. Яахав, ичсэн халагтаа  жилдээ нэг удаа “Next stop”-оор оны залуугаа шалгаруулаад  мөнөөх олон “Тэргүүний” тэмдэгээ  түгээгээд явж байвал тэр л дээд болох биз.

Г.Учрал