Б.Жавхлан: БНХАУ-д хийсэн айлчлалаар хөндсөн асуудлыг энэ сарын 15-нд дахин хэлэлцэнэ

Монгол Улсын Засгийн газрын хуралдаанаас гарсан шийдвэрийг танилцууллаа. Энэ үеэр Сангийн сайд Б.Жавхлан мэдээлэл өгсөн юм.

Тэрбээр "Энэ удаагийн уулзалтаар техникийн шатанд, дэлгэрэнгүй мэдээлэл солилцсон. Манай улсаас танилцуулсан асуудлуудыг БНХАУ-ын тал өндөр ач холбогдол өгч уулзлаа. Энэ уулзалтаар ойрын хугацаанд эдийн засгийн өндөр ач холбогдолтой таван төслийг базаж, ярилцсан. Үүнийг танилцуулбал, 

АСУУДАЛ 1: Товлосон уулзалтаа хийж дуусгаад төлөвлөөгүй нэмэлт уулзалт хийсний үр дүн их байлаа. Үүний нэг нь хилийн солбицлын цэг юм. БНХАУ-ын Хөгжил шимтгэлийн хорооны даргатай ажлын уулзалт хийсэн. Үүгээр гурван боомтыг улам өргөжүүлж, харилцан ачаа тээвэр нэмэгдүүлэх ажлыг ярилцсан. Үүнд Гашуунсухайт Ганцмод, Бичигт зүүн хатавч, Шивээхүрэн сэхээ боомтууд багтсан. 10 орчим жил гацаад байсан солбицлын цэгийг эцсийн байдлаар тохирсон.

Ялангуяа Гашуунсухайт Ганцмод боомтод солбицлын цэгийг ашиглаж харилцан төмөр замыг нэвтрүүлэх, ачаа, таваарыг шилжүүлэх, ачиж буулгах цэг буюу дараагийн ажил руугаа орсон. Үүний ТЭЗҮ, боломжит судалгаануудыг эцсийн байдлаар өнөөдөр хөрвүүлж дуусгалаа.

Хоёрдугаар сарын сүүл гуравдугаар сарын эхээр дахин уулзах уулзалтыг наашлуулж, хоёрдугаар сарын 15-нд товлосон. Энэ уулзалтаар "Терминалаа эцсийн байдлаар аль талдаа барих вэ" гэдгээ тохирвол цаашдын хөрөнгө оруулалтын ажлууд шийдэгдэж, бүтээн байгуулалтын ажлыг энэ жилдээ шуурхайлах юм. Боомт бол хоёр улсын эдийн засагт харилцан ашигтай байдаг учраас БНХАУ-д ч өндөр хүлээлттэй байгаа.

АСУУДАЛ 2, 3: Нэг бүс нутгийн бүтээн байгуулалттай холбоотой төсөл байсан. Энэ нь хойд, урд хилийг холбох Замын-үүд Алтанбулаг хоорондын хурдны авто зам болон хос төмөр замын бүтээн байгуулалтыг ярьсан. Үүнийг БНХАУ-ын талаас ач холбогдол өгч хүлээж авсан. Үүнтэй холбоотой ТЭЗҮ, баримт материалыг өгөөд байна. Үүнийг мөн л хоёрдугаар сарын 15-ны уулзалтаар дахин ярих юм.

АСУУДАЛ 4, 5: Улаанбаатар хотын түгжрэл, дэд бүтэцтэй холбоотой асуудал дараагаар нь яригдлаа. Үүнд LRT буюу баганат нийтийн тээврийн хэрэгсэл байв. Энэ нь 49 км явах нийтийн тээврийн хэрэгслийн асуудал хөндөгдсөн.

Мөн Улаанбаатар хотын  алслагдсан дүүргүүдээр тойрог зам бүхий 71 км хурдны замын бүтээн байгуулалтыг хийхээр төлөвлөснөө танилцуулсан. Үүнд БНХАУ-ын тал дэмжиж оролцоно гэдгээ илэрхийлсэн юм. Үүнийг хоёрдугаар сарын 15-ны уулзалтаар ахисан түвшний урьдчилсан байдлаар шийдвэрийг гаргах юм.