БНХАУ-аас оруулж ирсэн шинжилгээгээр баталгаажаагүй их хэмжээний тахианы мах худалдаанд гарсан байж болзошгүй

Импортын мах махан бүтээгдэхүүнийг -18 хэмээс багагүй температуртай, зориулалтын хөргүүр бүхий чингэлгээр тээвэрлэнэ гэж Хүнсний аюулгүй байдлын тухай хуульд заасан. Гэвч энэ хуулийг ноцтой зөрчиж, зориулалтын бус таваарын чингэлэгт тээвэрлэсэн 420 тонн тахианы махыг шинийн нэгний өдөр хилээр оруулж иржээ. Зөрчилтэй тус тахианы махыг БНХАУ-ын +4 хэмийн дулаан уур амьсгалтай Жининг хотоос 10 гаруй хоног тээвэрлэн авч ирсэн бөгөөд дээрх тахианы мах нь муудсан ч байж болзошгүй юм. 10 чингэлэг бүхий 420 тонн тус тахианы махнаас Мал эмнэлгийн ариун цэврийн төв лаборатори дээж авч шинжилж буй бөгөөд шинжилгээний хариу нь маргааш гарах аж. Гэтэл шинжилгээний хариу гараагүй байхад өчигдрөөс эхлэн зөрчилтэй тахианы махыг хөдөө орон нутаг болон Улаанбаатар хотын иргэдийн хүнсний хэрэгцээнд нийлүүлж, худалдаалсан талаар мэдээлэл гараад байна. Баталгаагүй хүнс хилээр нэвтрүүлж, хүнсний хэрэгцээнд нийлүүлнэ гэдэг бол ард иргэддээ хор өгч буйгаас ялгаагүй үйлдэл юм.

Стандартын бус хөргүүргүй чингэлгээр тээвэрлэн оруулж ирсэн тахианы махыг буцаах аль эсвэл шууд устгалд оруулах ёстой байтал Хилийн мэргэжлийн хяналтын газар дээрх арга хэмжээг аваагүй.  Гаалийн ерөнхий газрын дарга, удирдлагууд ажлын хариуцлага алджээ. Энэ асуудлын ард албан тушаалаа урвуулан ашигладаг, авлига авдаг эрх бүхий албан тушаалтнууд ч байж мэднэ.

БНХАУ-аас импортоор орж ирсэн 420 тонн тахианы махыг НВЦ групп, Хос-Очир трейд, Агро ХХК, Батширээт ХХК, Далай цэнгэл ХХК, Хасхүү ХХК, Asian organic ХХК зэрэг нэр бүхий 7 компанийн оруулж иржээ.

Хүн амын хүнсний аюулгүй байдалтай холбоотой тус асуудлыг Тойм.мн сайтын сурвалжлах баг тодруулахаар ажиллаж байна.