Б.Батцэцэг: Айлчлалаар Орос-Монгол-Хятад гурван улсын уулзалт зохион байгуулах санал тавьсан

Засгийн газраас гаргасан шийдвэрийг танилцууллаа. 

 Гадаад харилцааны сайд Б.Батцэцэг Ерөнхий сайдын БНХАУ-д хийсэн айлчлалын талаар мэдээлэл өглөө. Тэрбээр "Олимпын наадам бол хүн төрөлхтний эв нэгдлийн бэлэг тэмдэг учир аливаа хэлбэрээр улстөржүүлж болохгүй учир Бээжингийн олимпын наадамд оролцохоо мэдэгдсэн дэлхийн удирдагчдын нэг болсон. Богино хугацаанд үргэлжилсэн айлчлал болсон хэдий ч маш шахуу програмтай, үр дүнтэй, өгөөж ихтэй айлчлал болсон гэдгийг хоёр тал аль аль нь цохон тэмдэглэсэн.

Ерөнхий сайд Л.Оюун-Эрдэнэ МАН-ын даргын хувиар БНХАУ-ын Бүгд найрамдах намын дарга Ши Жинпиньтэй болон Төрийн зөвлөлийн Ерөнхий сайдтай албан ёсны уулзалт хийсэн. Хоёр улсын Засгийн газар хооронд хэрэгжих хөгжлийн төсөл хөтөлбөрүүдийг эрчимжүүлэх, бодлогын баримт бичгүүдийг уялдуулах зэргээр санал солилцож, харилцан ойлголцолд хүрсэн.

Хоёр улсын Засгийн газрын хоорондын хөгжлийн төсөл хөтөлбөрийг шинэ шатанд гаргах зэрэг хэд хэдэн асуудалд шийдэлд хүрсэн.

Хилийн боомтууд дээр үүссэн нөхцөл байдал, зэсийн баяжмал, нүүрс, төмрийн хүдэр зэргийн экспортыг хэвийн горимд шилжүүлэх нөхцөлийг хурдан бүрдүүлэх, харилцан ашигтай хамтарч ажиллах, цөлжилттэй тэмцэх зэрэг төслүүдийг хэрэгжүүлэх зэрэг асуудлаар дэлгэрэнгүй ярилцсан.

Мөн Орос-Монгол-Хятад гурван улсын уулзалтыг зохион байгуулах санал тавьсан байгаа. Мөн Монголбанкны Ерөнхийлөгч Б.Лхагвасүрэн оролцож, своп хэлцлийг гурван жилээр сунгах асуудлыг ярьсан.

 БНХАУ-ын талаас Монголын улс төрийн тогтвортой байдлыг чухалчилж үзэж байгааг дурдсан. Засгийн газраас дэвшүүлж буй Шинэ сэргэлтийн бодлогын хүрээнд боомт, эрчим хүч, аж үйлдвэржилт, Улаанбаатар хотын түгжрэлийг сааруулах болон ногоон хөгжлийн чиглэлийн томоохон төслүүдийг хэрэгжүүлэхэд хамтран ажиллахаа мэдэгдсэн. Мөн Алтанбулаг-Замын-Үүд чиглэлийн хурдны автозам болон хос урсгалтай төмөр зам барих, Гашуунсухайт-Ганцмод, Шивээхүрэн-Сэхээ боомтыг төмөр замаар холбох, Гашуунсухайт боомтоор гарч буй нүүрс тээвэрлэлтийн хэмжээг нэмэгдүүлэх зэрэг олон асуудлуудаар тохиролцоонд хүрсэн.

Сангийн сайд Б.Жавхлан, Нийслэлийн Засаг дарга Д.Сумъяабазар нар төсөл хөтөлбөрүүдийн талаар дэлгэрэнгүй ярилцсан" гэлээ.