Ч.Мөнхбаяр: Бээжингийн олимп маш тааруухан явагдаж байгааг бүгд гайхаж байна

Нийтлэлч Ч.МӨНХБАЯР: Түркийн трамплинч Фатих Ипчиоглу Зүүн Түркестаны далбаатай дуулга, цанатайгаар Бээжингийн олимпод оролцож, Шинжаанд үйлдэж байгаа уйгур ба бусад ард түмнийг харгислаж байгааг эсэргүүцэж, хятадууд боож үхэх дөхөв.

Бээжингийн олимп маш тааруухан явагдаж байгааг бүгд гайхаж байна. Тамирчдыг хөдөө байх олимпийн тосгонд цөлж, байр, тэмцээн, бэлтгэлийн хооронд онцгой дэглэмийн дагуу тууж, цаг боллоо гэнгүүт ахин тууж, байранд нь авчраад бараг хорьчихдог. Хятадуудын заналхийлэл, доромжлолоос болоод гадаадын зарим баг тамирчдаа утсаа битгий ашигла, хураалга гэж байгаа. 

Ч.МӨНХБАЯР: Бээжингийн олимп маш тааруухан явагдаж байгааг бүгд гайхаж байна.

Коронагийн хийрхэл Хятадад туйлдаа хүрснийг гадаадынхан алмайрч байна. Коронагаас хятадууд үхтлээ айж, нэг нь корона тусваас уйлалддаг гэнэ. Үнэн худал нь мэдэгдэхгүй, дэндүү олон хүнийг эерэг гаргаж, олимпоос хөөж тусгаарлан хорьж байгаа. Олимпийн хүрээнд 363 эерэг гаргасны дотор олон олимпийн найдвар болсон тамирчин орсон. Битүү цагаан хувцастай хүмүүс алхам тутамд хянаж, дагаж, заавардаж, зандарч, хөөж туудаг. Юун Шинжаан, олимпод ч концлагерь байнам бус уу гэж зарим хүн үглэж буй аж. Спортын холбоодын авлигажилт будлиан булхай үүсгэсээр. Норвегийн гарамгай тамирчин Клебог “уралдаад хэрэггүй, түүнд бүх түрүүг шууд өг” гэж хошигнодог. Гэтэл барианы өмнө Клебо Оросын Большунов хоёр мөргөлдсөн. Барианд түрүүлж орсон Клебог хүн мөргөсөн гээд олимпоос хасаад, Орос анхны алтаа хүртэв.

НХЛ Бээжингийн олимп нь хүний эрх зөрчих гэж байна гээд тамирчдаа оролцуулахгүй болсон. Үнэхээр бодит байдал дээр тийм л байна. НХЛ-ийн тамирчид орохгүй тул хоккей хөгжсөн улсуудын багууд маш сул бүрэлдэхүүнтэй ирсэн. АНУ-ын баг гэхэд дан оюутан хүүхдүүдээс бүрдсэн, хамгийн залуу баг. Коммунист хийрхэгчдэд л гоё гэхээс, спорт сонирхогчдын хувьд бол өвлийн олимпийн гол үйл явдал болох хоккейн тэмцээн үзүүштэй бус болно. КХЛ-д сайн хоккейчид нь байдаг Оросын багт алтан медалийг шууд өгөх хэрэгтэй. Олимпод дэлхийн 200 улсаас 30-хан улсын төрийн төлөөлөгч ирсэн тул, VIP сектор эзгүйрсэн байв. Тэр 30 улсын ихэнхи нь “дэлхийн дайсан” гэгдсэн болохгүй бүтэхгүй, муугийн муу улсууд. Коронад маш хатуу ханддаг Японы Токиод болсон олимпод огт ийм уур амьсгал байгаагүй, бүрэн эрх чөлөөтэй байжээ гэж учир мэдэх хүмүүс халаглаж байна.