Умард Солонгос хулгайлсан криптовалютаа пуужингийн хөтөлбөрт зарцуулж байна гэж НҮБ мэдээлэв

2020 оноос 2021 оны дунд үе хүртэл БНАСАУ кибер халдлагаар олон арван сая долларын үнэ бүхий криптовалют хулгайлж, тухайн хөрөнгөө пуужингийн хөтөлбөртөө зарцуулсан гэж НҮБ-аас гаргасан тайланд дурджээ. Ийм төрлийн кибер халдлага нь Пёньяаны цөмийн болон пуужингийн хөтөлбөрийн орлогын чухал эх үүсвэр болдог гэж судлаачид үзэж байна.

БНАСАУ-ын эсрэг авсан хориг арга хэмжээний асуудлаарх шалгалтын дүнг НҮБ-ын комисст өнгөрсөн баасан гарагт хүргүүлжээ. НҮБ-ын тайланд кибер аюулгүй байдлын Chainalysis фирмийн нэгдүгээр сард хийсэн судалгааны үр дүнг тусгасан байна. 

Умард Солонгосын хакерууд (ард нь төр байгаа нь эргэлзээгүй) өнгөрсөн онд л гэхэд 400 сая долларын дижитал хөрөнгө хулгайлжээ.

Энэхүү судалгааг явуулсан мэргэжилтнүүдийн дүгнэснээр Умард Солонгосын хакерууд (ард нь төр байгаа нь эргэлзээгүй) өнгөрсөн онд л гэхэд 400 сая долларын дижитал хөрөнгө хулгайлжээ. Хакерууд Умард Америк, Европ, Ази дахь криптовалютын гурван биржийг хакердсан байна.

Хэдийгээр НҮБ-ын Аюулгүйн зөвлөл Хойд Солонгост цөмийн туршилт хийж, баллистик пуужин хөөргөхийг хориглосон ч Пёньяан цөмийн хөтөлбөрөө хөгжүүлсээр байна гэж НҮБ-ын тайланд дурджээ. Мөн кибер халдлага, шинжлэх ухааны хамтарсан судалгаа хийх зэргээр энэхүү хөтөлбөрт хэрэг болох материал, технологийг хилийн чанадаас хайсаар байгаа талаар бичсэн байна.

2019 онд НҮБ-ын тайланд кибер халдлагын үр дүнд Умард Солонгос үй олноор хөнөөх зэвсэг бүтээх хөтөлбөртөө хоёр тэрбум доллар хэмнэж чадна гэж тэмдэглэжээ.

Түүнчлэн хориг арга хэмжээг ажиглаж буй НҮБ-ын албаны хүмүүс Пёньяан сүүлийн үед пуужингийн туршилтаа эрчимжүүлсэн гэж мэдэгдэв. Тухайлбал, тус улс зөвхөн нэгдүгээр сард л гэхэд есөн удаа пуужингийн туршилт хийсэн байна.