Путин, Ши Жиньпин нар NATO-гийн өргөжилтийн эсрэг байгаагаа илэрхийлэв

Өвлийн олимпын XXIV наадмын нээлтэд оролцохоор Бээжин хотод хүрэлцэн ирсэн ОХУ-ын ерөнхийлөгч Владимир Путин өчигдөр Хятад улсын төрийн тэргүүн Ши Жиньпинтэй уулзжээ.

Хоёр удирдагч коронавирусийн цар тахал эхэлснээс хойш анх удаагаа нүүр тулан уулзаж байгаа нь энэ юм. Уулзалтын үеэр тэд олон улсын харилцааны хэд хэдэн чухал асуудлууд дээр нэгдсэн байр суурьтай байгаагаа илэрхийлсэн байна.

Кремлийн хэвлэлийн алба уулзалтыг “халуун дулаан уур амьсгалтай” болж өнгөрснийг дурдаад “Орос, Хятадын найрамдалт харилцаанд хязгаар байхгүй, хамтын ажиллагаанд ямар нэг хориг саад байхгүй” болохыг мэдэгджээ.

Хоёр улсын хамтарсан мэдэгдэлд Украйны хямралын талаар шууд дурдаагүй ч хүйтэн дайны үзэл суртлыг дэвэргэж буй NATO-г шүүмжилж, тус байгууллагын өргөжилтийн эсрэг байгаагаа батлан илэрхийлсэн байна.

Үүнээс гадна талууд Aukus батлан хамгаалах салбарын хамтын ажиллагааны гэрээг АНУ, Их Британи, Австрали улсууд байгуулсанд санаа зовниж байгаагаа мэдэгджээ.

Дээрх гурван улс Ази, Номхон далайн бүс нутагт Хятад улсын хүч нөлөөг хязгаарлах зорилготойгоор өнгөрсөн онд уг гэрээг байгуулж байв.

Хамтарсан мэдэгдэлд орсон бас нэг сэдэв нь Тайванийн асуудал байлаа. Бээжингийн эрх баригчдын “Нэг Хятад” гадаад бодлогыг ОХУ тууштай дэмжиж байгааг хамтарсан мэдэгдэлд онцолжээ.

Өөрөөр хэлбэл Тайвань арал нь Хятад улсын газар нутгийн салшгүй хэсэг болохыг дэмжиж байгаагаа Путин уулзалтын үеэр батлан илэрхийлсэн байна.

ОХУ нь NATO-гийн Дорнод Европ дахь тэлэлтийг шаргуу эсэргүүцэж, өөрийн аюулгүй байдалд баталгаа гаргаж өгөхийг АНУ тэргүүтэй өрнөдийн орнуудаас шаардаж байгаа юм.

Тус улсын 100,000 орчим цэрэг Украины хил дагуу байрласан нь NATO-д шахалт үзүүлэх зорилготой гэж ажиглагчид үзэж байна. Харин АНУ үүнийг ОХУ-ын зүгээс Украин улсыг эзлэн түрэмгийлэхээр бэлдэж байна хэмээн шүүмжилж байгаа юм.

Хятад улсын хувьд Тайвань арлыг хүчээр нэгтгэх боломжийг үгүйсгэхгүй байгаагаас гадна Өмнөд Хятадын тэнгист газар нутгийн маргаан үргэлжилж байгаа. Тиймээс Өрнөдийн орнуудын дарамт шахалт Орос, Хятад улсуудыг ойртон нягтрахад хүргэсэн нь Путин, Ши Жиньпин нарын хамтарсан мэдэгдлээс харагдаж байна.

 

Эх сурвалж: BBC