Гурван дарга цагаан сараар юу "ярьсан" бэ?

Монгол Улсын Ерөнхийлөгч, УИХ-ын дарга, Ерөнхий сайд цагаан сараар олон нийтэд хандаж мэндчилгээ дэвшүүлдэг уламжлалтай. Энэ жил ч тэгэв. Мэдээж хэрэг, цагаан сарын бэлгэдлийг бодож ерөөл өргөхийн зэрэгцээ болж бүтэж байгаа бүрийг хэлэх ёстой. Түүнийг ч дагав. Харин 2022 он гараад удалгүй тохиож буй цагаан сараар дэвшүүлсэн мэндчилгээнээс нь тэдний хийхээр төлөвлөсөн ямар ажлууд болон гарч байгаа Бар жилийг хэрхэн харж байгааг онцлон хүргэе.

Монгол Улсын Ерөнхийлөгч У.ХҮРЭЛСҮХ:

-Морилон ирж буй “Буян үйлдэгч” хэмээх Усан бар жилд Их Монгол Улсыг үүсгэн байгуулагч Их эзэн Чингис хаан мэндэлсний 860 жилийн ойг орон даяараа тэмдэглэж, мянганы суут Чингис хааны аугаа үйл хэрэг, суу алдар, билиг сургаалыг ард түмэн, үр хүүхэд, хойч үедээ өвлүүлэн түгээж, дэлхий ертөнцөд мөнхжүүлэн алдаршуулах учиртай. ....Ирж буй жилдээ монголчууд бид эв эеэ эрхэмлэн дээдэлж, бие эрүүл, сэтгэл өөдрөг, итгэл төгс, эрч хүч дүүрэн байж, хамтын зүтгэлээр хэвийн амьдралдаа эргэн орж, улс орон, ард түмний маань ажил амьдрал дэвжин дээшилсэн сайхан жил болно гэдэгт итгэл дүүрэн байна.

УИХ-ын дарга Г.ЗАНДАНШАТАР:

-Усан бар жилд монголчууд бид цар тахлын цаг үеийг даван туулж, улмаар “Шинэ сэргэлт”-ийн замаар замнах болно. УИХ, Засгийн газраас дэвшүүлж буй энэ бодлого Монгол Улсаа тогтвортой өсөлт, үсрэнгүй хөгжилд хүргэх цоо шинэ ирээдүй байх болно. ... Шударга нийгэм, хариуцлагатай төр, чинээлэг иргэн бүхий улсыг цогцлоож, Монголоо сэргээн мандуулах Та бидний хамтын хичээл зүтгэл сайн сайхан ирээдүйд тун удахгүй хүргэнэ гэдэгт огтхон ч эргэлзэхгүй байна. "Буян үйлдэгч” хэмээх усан бар жилд Монгол эх орон, монгол түмний минь заяа буян тэгш, өлмий өнө бат оршиж, элбэг хангалуун, итгэл дүүрэн, цог хийморь бадрангуй байхын өлзийт ерөөлийг өөд өөд нь дэвшүүлэн барья.

Ерөнхий сайд Л.ОЮУН-ЭРДЭНЭ:

-Монгол Улсын Засгийн газраас хэрэгжүүлж “Шинэ сэргэлтийн бодлого”-ын хүрээнд боомилогдсон боомтуудаа авто зам, төмөр замаар холбох, -Эрчээ алдсан эрчим хүчний салбараа сэргээх, -Аж үйлдвэржилтийн үндэсний бодлогоо дахин сэргээх, -Суусан хотоо алхаатай хот болгох, -Цахим үндэстэн болж, авилга, хүнд суртлыг бууруулан, шударга ёсыг бэхжүүлж, төрийн бүтээмжийг дээшлүүлэх, -Эдгээрт чиглэсэн их бүтээн байгуулалт энэ хавар эхлэх болно. Цар тахлын эдийн засгийн хүндрэл, тээвэр логисктикийн хямралт байдал, түүнээс үүдсэн бараа бүтээгдэхүүний үнийн өсөлт зэргийг бид гагцхүү эдийн засгийн эрчимтэй өсөлтөөр л даван туулах боломжтой билээ. Тиймээс “Шинэ сэргэлтийн бодлого”-ыг хэрэгжүүлэх их үйлсэд иргэн, аж ахуйн нэгж, хөрөнгө оруулагчид та бүхнийг идэвхитэй оролцохыг хүсье! ... Хэдийгээр хоёр жилийн дараа та бид Сар шинийн уламжлалт баяраа хатуу хөл хориогүйгээр тэмдэглэж байгаа ч халдварын эрсдлээс өөрийгөө болон хайртай хүмүүсээ хамгаалж, гэр бүлийн хүрээнд цомхон тэмдэглэж, цахимаар золгож, гаднаас бараа таваар худалдан авахаас илүүтэйгээр Үндэсний мөнгөн тэмдэгтээ бие биедээ бэлэглэж, улсын валютын нөөцөө хамгаалж, эдийн засаг хүнд үед эх оронч байхыг Монгол Улсын Ерөнхий сайдын хувьд хичээнгүйлэн уриалж байна.

Б.Баяр 

Эх сурвалж: Зууны мэдээ сонин