“Буян үйлдэгч” хэмээх усан бар жилийн өнгийг ХАМБА ЛАМ НАР хэрхэн шинжив

Эрхэм уншигч түмэндээ хаврын тэргүүн сарын шинийн нэгний билэгт сайн өдрийн мэндийг хүргэж байна.  Эхэлж буй "Буян үйлдэгч" хэмээх усан бар жилийн өнгийг  Монголын томоохон хийдүүдийн хамба лам нар хэрхэн шинжиж буйг товчлон хүргэж байна. Та бүхэн сайхан шинэлээрэй 

 

Монголын Бурхан шашны төв Гандантэгчинлэн хийдийн тэргүүн хамба,"Хамба номун хан" гавж Д.ЧОЙЖАМЦ:

ӨНДӨР НАСТНУУДАД БЭРХ, ЗАЛУУСТ САЙН ЖИЛ ГАРАХ ЗУРЛАГАТАЙ БАЙНА

“Оюун ухаантай хүн төрөлхтөн ирээдүйгээ мэдэх хүсэл эрмэлзэл дүүрэн байсан. Энэ нь тэр дундаа Азийн орнуудад өөрийн болон улс орны ирээдүй ямар байх бол хэмээн олон төрлийн арга ухааныг ашиглаж бодож, таамаглаж ирсэн.

Энэ жилийн зурлагаар улирлын эхэн үед бороо хур их, хүйтэн байна. Тиймээс хүйтэн сэрүүнээс өөрсдийгөө хамгаалах хэрэгтэй.

Өндөр настнуудад бэрх, залуучуудад сайн жил гарах зурлагатай байна. Ерөнхий нийтээрээ сарны хэмжээнд жаргалтай байна. Өөрсдөө хичээвэл ямар ч зурлагыг өөрчилж болно. Монголын төр засгийнхан анхааралтай байх хэрэгтэй талаар сүүлийн хэдэн жил төсөөлөл гарсан. Ард түмнийхээ төлөө зөөлөн, хэл үгийг нь сонсож ажил, үйл болговол эв зохицлоо олно. Залуус, ард түмэн засаг төрийнхөө олон ажлыг үнэлж сурах хэрэгтэй.

Сүүлийн хэдэн жил манай улс дэлхийд байхгүй ухаан гаргалаа. Бид үүнд баяртай байгаа. Бурууг шүүмжилж, болж байгааг нь сайшаах нь зүйтэй. Тиймээс бид хоорондоо эвтэй байхыг чухалчлах ёстой.

Бурхан багш “Чи өөрөө өөрийнхөө аврал шүү” гэж айлдсан байдаг. Өөрөө зүтгэл гаргавал сайн сайхныг дагуулна.

 

Монголын Их хүрээ хийдийн хамба номун хан, гэвш З.САНЖДОРЖ:

УСАН БАРС ЖИЛД ӨВЧИН ИЛААРШИЖ, АРД ОЛОН АМГАЛАН ЖАРГАЛТАЙ  БАЙНА

Монголын уламжлалт зурхайн ном сударт тухайн жилийн өнгө ерөнхий төлөвийг хаврын уур орох өдрөөр тодорхойлсон байдаг. Ирж байгаа усан барс жилийн хаврын уур орох өдөр хоёрдугаар сарын 4-ны өдөр буюу шинийн дөрөвний шар хулгана өдөр тохиож байна.

Жилийн ерөнхий төлөвийг хаврын уур орох өдрөөр шинжин үзвэл хаврын сард салхи шуурга багатай, баяр баясгалантай. Зундаа өвс ногооны гарц сайн, хур бороо элбэг. Намартаа өмнө зүгийн хил орчмоор гандуу боловч үр тариа арвин. Өвөлдөө цас багатай өнтэй сайхан жил болно. “Сайжруулагч” хэмээх усан барс жилд алт мөнгө элбэг, ард иргэд амгалан тайван, аз жаргалтай хэмээн зурхайд буужээ.

“Сайжруулагч” хэмээх усан барс жилд өвчин илааршиж, ард олон амгалан жаргалтай  байна. Тиймээс ирэх жил Ковид буюу хижиг өвчин суларна. Ихэс дээдэст хатуу, хууль цаазын шинэчлэлт их гарах магадлалтай жил гарч байна.

Шороон үхрийн зурлагаар ирэх жилийг шинжвэл:

Үхэр хариулаач нь: Шар дээл, шар малгайтай хөл нүцгэн залуу хүнээр дүрсэлжээ. Үүний учир нь: Хөл нүцгэн учир амгалан тайван, жаргалтай. Залуу хүн дүрсэлсэн учир идэр залууст ээлтэй сайн, нялхас багачуудад ширүүн, өндөр настан, ихэс дээдэст хатуу жил гарна. Ирэх жилийн хаврын уур орох өдөр шинийн нэгнээс хойш тохиож байгаа учир үхэр хариулаач нь үхрийн хойно дагаж явж буйгаар дүрслэгджээ.

Монгол зурхайн “Түвдэнпэлжээлин” хийдийн хамба лам Ж.ГОНЧИГСҮРЭН: 

УЛС ОРНЫ ЕРӨНХИЙ НУРУУ САЙН

“Шороон үхэр”-ийн шинжээр жилийн ерөнхий байцыг дүгнэвэл, салхи ихтэй, навч цэцэг дэлгэрэн хий өвчин тархана. Хавар болон улирлуудын эхээр хуртай. Улс орны ерөнхий нуруу сайн. Жилийн эхээр гандуу боловч жилийн дундуур хур бороо ихтэй.

Залууст амгалан, нялхас болон өвгөдөд ширүүн жил болно. “Жаран жил”-ийн үрийн зурхайд “Сайжруулагч” хэмээх бар жилд алт, мөнгө элбэг, хүмүүн жаргалтай хэмээн буусан. Төвөдөөр “гижид” буюу буян үйлдэгч гэсэн утгатай. Хүнээс өөрөөс нь шалтгаална. Хүн бүр буян хийгээд муу муухай зүйлийг тэвчвэл энэ жил сайхан жил гарна.