Украиныг НАТО-д элсүүлэхгүй байх Москвагийн шаардлагад АНУ татгалзсан хариу өгчээ

ОХУ-ын аюулгүй байдлын баталгаа шаардсан саналын хариуг АНУ бичгээр өгчээ. ОХУ-ын Гадаад хэргийн яам АНУ, НАТО аюулгүй байдлын баталгааны талаар бичгээр хариу ирүүлснийг батлав. ОХУ энэхүү саналаа өнгөрсөн оны 12 сарын дундуур хүргүүлсэн юм.  Аюулгүй байдлын баталгаанд НАТО-г зүүн зүг тэлэхгүй байх, тухайлбал Украин  зэрэг хуучин ЗХУ-ын бүрэлдэхүүнд байсан зарим улсыг НАТО-д элсүүлэхгүй байх зэрэг саналыг тусгасан юм. 

АНУ-ын Төрийн департаментын тэргүүн Энтони Блинкен хэлэхдээ "НАТО нээлттэй хаалганы зарчмыг баримталдаг. Гэсэн хэдий ч  Москвагаас эвслийг зүүн тийш тэлэхгүй, Украиныг гишүүнээр элсүүлэхгүй гэсэн баталгаа гаргаж өгөхийг шаардсан" гэдгийг онцолжээ.

Хэлэлцээр хийх орон зай үлдээхийн тулд АНУ Орост өгсөн хариуныхаа текстийг нийтлэх бодолгүй байгааг Блинкен тэмдэглэв. Гэсэн хэдий ч түүний мэдэгдлээс харахад уг баримт бичигт Украиныг НАТО-д элсүүлэхгүй байх байх хүсэлтийг хүлээж аваагүй бололтой.  

Блинкен лхагва гарагт болсон хэвлэлийн бага хурал дээр "Орос ямар хариу өгөхөөс шалтгаална. Бид нөхцөл байдлын аливаа өрнөл явцад  бэлэн байна" гэжээ.  Мөн тэрээр "Бид дипломат ёсыг илүүд үздэг" гэж онцлон тэмдэглэв.

Блинкен хэлэхдээ,  Оросын албаны хүмүүстэй хэлэлцээ хийсний дараа АНУ-ын дипломатуудын хэлсэн зарим санал энэхүү Вашингтоны хариуд багтсан байгаа. Тодруулбал, цөмийн зэвсгийн зохицуулалт, цэргийн сургуулилт, довтолгооны зэвсгийг байрлуулах талаар ил тод байдлыг нэмэгдүүлэх зэрэг асуудлыг тусгасан гэжээ. Уг баримт бичгийн агуулгыг Украин болон НАТО-гийн холбоотон орнуудтай тохиролцсон гэж Төрийн департаментын тэргүүн онцолжээ.

"Энэ бол албан ёсны хэлэлцээний баримт бичиг биш, эдгээр нь мөн шууд санал биш, зүгээр л бид хамтдаа хамтын аюулгүй байдлыг хэрхэн бэхжүүлэх талаар зарим санааг тусгасан" гэж тэр хэлэв.

Үүний зэрэгцээ АНУ-ын Төрийн нарийн бичгийн дарга Оросын гол шаардлага буюу Хойд Атлантын холбоо Европт шинэ гишүүдтэй болох боломжгүй гэсэн үндсэн шаардлагыг няцаасан юм. "Бидний үзэж байгаагаар НАТО-гийн үүд хаалга нээлттэй хэвээр байгаа тул бид энэ зарчмыг баримталж байна" гэж тэр хэлжээ

Харин энэ хариу бичгийн тухайд ОХУ-ын Гадаад хэргийн сайд Сергей Лавров хэлэхдээ, АНУ-аас бичгээр хариу авсны дараа ОХУ-ын ГХЯ болон бусад яамдууд  цаашид авах арга хэмжээний талаар ерөнхийлөгч Владимир Путинд санал бэлтгэж оруулах болно. гэв.