Л.Энх-Амгалан: Сургуулийг хугацаанд оруулахыг хүсвэл Цагаан сарын баярыг өргөн тэмдэглэхгүй байхыг хүсэж байна

Монгол Улсын Засгийн газрын хуралдаан үргэлжилж байна.  Хуралдаанаас гаргасан шийдвэрүүдийг танилцуулж байна. 

Засгийн газрын өнөөдрийн хуралдаанаар Ерөнхий боловсролын сургуулийн хичээл хоёрдугаар сарын 14-нд 5/9 зарчмаар эхлүүлэх шийдвэр гаргасан байна. Цар тахлын нөхцөл байдлаас хамаарч сурагчдын танхимын хичээл эхлэх хугацааг долоо хоногоор хойшлуулж байгаа талаар мэдээлсэн. 

Энэ талаар БШУ-ы сайд Л.Энх-Амгалан дэлгэрэнгүй мэдээлэл өглөө. 

 -Энэ нь зөвхөн нийслэл хотод ийм зохицуулалт хийлээ. Хөдөө орон нутагт өндөржүүлсэн бэлэн байдлын зэрэглэлээс шалтгаалаад хэрэв ногоон бүстэй сум байх юм бол хичээл сургуулийг зуун хувь танхимаар зохион байгуулах ийм боломж байгаа гэж харж байгаа. Улсын хэмжээнд 2-12 дугаар ангийн хүүхдүүдийн дунд хийсэн судалгаагаар сүүлийн хоёр жилд хичээлийн хоцрогдол жаран хувьтай байна, нэгээс гуравдугаар ангийн хүүхдүүд болбол маш их хоцрогдолтой байна гэдэг ийм дүгнэлт гарсан. Тэгэхээр одоо бид нар аль болохоор нэг өдөр ч гэсэн танхимаар илүү хичээллүүлэх ийм боломжийг судалж байна. Тэгээд хоёрдугаар сарын 28-аас зуун хувь танхимаар хичээллүүлэх үйл ажиллагааг зохион байгуулахаар надад үүрэг болголоо. 

Сурагчдын амралтыг яагаад долоо хоногоор оношлуулж байгаа вэ гэхээр Омикроны давлагааны оргил үе ингэж таарч байгаа юм байна.  Улсын онцгой комисс болон эрдэмтдийн хийж байгаа судалгаагаар цаашдаа буурах болов уу гэсэн тийм төсөөлөлтэй байгаа. Сургууль цэцэрлэгийнхээ үйл ажиллагааг 14-нөөс эхлүүлж байна. Тиймээс Цагаан сарын баяраа өргөн  тэмдэглэмээргүй байна аа.  Энэ өвчний давлагаа ихсэх юм бол хичээл сургуулийн асуудал хойшлох  бодитой эрсдэл байна.