НАТО Зүүн Европ дахь оролцоогоо идэвхжүүлж байна

Украины эргэн тойронд үүссэн нөхцөл байдлын улмаас НАТО Зүүн Европ руу хөлөг онгоц, нисэх онгоц илгээнэ

Украины эргэн тойронд үүссэн нөхцөл байдалтай холбогдуулан НАТО Зүүн Европ дахь цэргийн оролцоогоо өргөтгаж байна. Тус эвслийн гишүүн орнууд дорно зүг рүү усан онгоц, нисэх онгоц шилжүүлж байна гэж  НАТО цахим хуудсанд мэдээлсэн байна.
"НАТО-гийн холбоотнууд Зүүн Европ дахь бүс нутгуудад зэвсэгт хүчнээ бэлэн байдалд оруулж, нэмэлт хөлөг онгоц, байлдааны онгоц илгээж байгаа нь Орос Украин болон түүний эргэн тойронд цэргийн хүчээ үргэлжлүүлэн нэмэгдүүлж байгаатай холбоотойгоор  урьдчилан сэргийлэх болон хамгаалалтыг бэхжүүлж байна" гэж мэдэгджээ.
Тухайлбал, Умард Атлантын эвслийн орнууд:
-Дани: Балтийн тэнгис рүү фрегат хөлөг онгц болон Литва руу дөрвөн F-16 сөнөөгч онгоц илгээж байна;
-Испани:  мөн хөлөг онгоц илгээж, Болгар руу сөнөөгч  нисэх онгоц явуулахаар төлөвлөж байна;
-Франц: Румынд хүчний ангиудаа шилжүүлэхэд бэлэн байгаагаа мэдэгдсэн;
-Нидерланд: хоёр F-35 сөнөөгч онгоцыг Болгар руу илгээж, хөлөг онгоц болон хуурай замын хүчнийг бэлэн байдалд оруулав;
- АНУ: эвслийн зүүн жигүүрт цэргийн хүчээ өргөжүүлэх боломжийг судалж байна.
Сүүлийн саруудад барууны хэвлэл мэдээллийн хэрэгслээр Москва Украинд "түрэмгийлэл" хийхээр бэлтгэж байгаа талаар улам бүр бичих болсон. Оросын тал үүнийг удаа дараа няцааж, ийм мэдэгдлийг Хойд Атлантын эвсэл цэргээ хилийн ойролцоо байгуулахад ашиглаж байгааг онцолсон юм.

Өмнөх долоо хоногт АНУ-ын Төрийн нарийн бичгийн дарга болон ОХУ-ын Гадаад хэргийн сайд нарын уулзалт амжилтгүй болсонтой зэрэгцэн АНУ Украинд зэвсэг нийлүүлэх ажиллагаагаа идэвхжүүлсэн бөгөөд Байден нэмж 200 сая долларын тусламжийг Киевт үзүүлэхээр боллоо.  Түүнчлэн Британи Украинаас дипломатууд болон иргэдээ татан авахаа мэдэгдсэн нь тэнд ямар нэг  таагүй зүйл болох гэж байна гэсэн ойлголтыг тлүү итгэл үнэмшилтэй болгож орхив бололтой.

ОХУ-ын хувьд Алс Дорнод дахь цэргийн анги нэгтгэлүүдээ татаж Белоруст төвлөрүүлсэн нь Орос Украин руу дайрах гэж байна гэсэн  таамаглалыг  улам бэхжүүлж өглөө. 

Украины Ерөнхийлөгч Зеленский гадаад тагнуулын өдрөөр  хийсэн уулзалт дээрээ "Өнөөдөр манай улс нэн аюултай аюул заналхийлэлтэй тулаад байна.  Ялангуяа бидний тусгаар тогтнол, нутаг дэвсгэрийн бүрэн бүтэн байдал, эв нэгдэлд заналхийлж байна. Энэ шийдвэрлэх үед үр дүнтэй тагнуулын ажиллагаа маш чухал үүрэг гүйцэтгэдэг" хэмээн тэмдэглэжээ. 

Болж буй үйл явдлын өрнөлтэй холбоотойгоор Путин Оросын аюулгүй байдлыг хангах арга хэмжээ авна гэж Песков мэдэгдэв
НАТО болон НАТО-гийн орнуудын төлөөлөгчдийн бидэнд туйлын таагүй хандсан мэдэгдлийг   уншсан. Энэ бол оршин байгаа бодит байдал юм. Манай төрийн тэргүүн зэвсэгт хүчний ерөнхий командлагчийн хувьд, манай улсын гадаад бодлогыг тодорхойлдог хүний ​​хувьд улс орныхоо аюулгүй байдлыг зохих түвшинд хангаж, бидний ашиг сонирхлыг хангахын тулд шаардлагатай арга хэмжээг авч байна" гэж Песков хэлээд Аюулгүй байдлын асуудлаар зөвлөлдөх, яриа хэлэлцээ хийх санаачлага нь Оросынх  байсан гэдгийг тэрээр тодотгожээ. 

Сануулахад ОХУ-ын зүгээс НАТО-гоос аюулгүй байдлын баталгаа шаардаж байгаа бөгөөд энэ хүрээнд НАТО-г зүүн тийш хил хязгаараа тэлэхгүй байх, өөргөөр хэлбэл Украин, Гүржийг тус эвсэлд элсүүлэхгүй байх,  хуучин ЗСБНХУ-ын бүрэлдэхүүнд байсан холбоотон орнуудтай цэргийн ямар нэг хамтын ажиллагаа  явуулахгүй байх, НАТО-г 1997 оны өмнөх хил хязгаартаа эргэн очих зэрэг санал тавьж энэ асуудлаар хэлэлцээ хийсэн ч  үр дүнд хүрэхгүй байгаа юм. Мөн дээрх саналуудынхаа хариуг Кремель бичгээр авахыг шаардаж байгаа ч одоог болтол өгөөгүй байна. 

Энэ тухайд Д.Песков ""Бид энэ долоо хоногт ирээдүйд ийм хурцадмал нөхцөл байдлаас зайлсхийхэд туслах зорилготой саналынхаа хариуг бичгээр авна гэж найдаж байна" гэж хэлжээ. 

Эх сурвалж: Риа новости болон бусад