Монгол Улсын гурван сая дахь иргэн Х.Монголжин охин 7 нас хүрлээ

2015 оны нэгдүгээр сарын 24-ний 08 цаг 27 минутад Монгол Улс гурван сая хүн амтай болсон. Гурван сая дахь иргэнээр Өмнөговь аймгийн Даланзадгад сумын иргэн Энхтүвшингийн Хатанболд, Ганбатын Аззаяа нарын ууган охин Монголжин бүртгэгдсэнийг Үндэсний статистикийн хорооноос албан ёсоор зарлаж байв. 

Хүн нэмэгдсэн энэ баярт мэдээг хэвлэлүүд хүргэж байсан бөгөөд тухайн үед Ерөнхийлөгч Ц.Элбэгдорж охины аав, ээжтэй утсаар ярин баяр хүргэж, Монголжин хэмээх нэр хайрласан билээ. Монгол Улсын гурван сая дахь иргэн Х.Монголжин охин өнөөдөр долоон нас хүрч байна. 

2015 оны нэгдүгээр сарын 24-ний өдөр Монголжингийн чацуутан улсын хэмжээнд 181 хүүхэд мэндэлжээ. Х.Монголжин охин өдгөө нэг дүүтэй болсон бөгөөд одоо рон нутагтаа гэр бүлийнхэнтэй эрүүл саруул өсөж байна. Монгол Улсын:

• Нэг сая дахь иргэн 1962 оны аравдугаар сард
• Хоёр сая дахь иргэн 1988 оны долоодугаар сарын 10-нд
• Гурван сая дахь иргэн Х.Монголжин 2015 оны нэгдүгээр сарын 24-нд төрсөн. 

“Хүн амын өсөлтийг хүн амын, төрөлт нас баралтын тоонд үндэслэн урьдчилан тооцоолдог. 2020 онд хийсэн хүн ам орон сууцны тооллогын дүнд үндэслэн хийсэн хэтийн тооцооны дүнгээр Монгол Улсын дөрвөн сая дахь иргэн 2035 онд, таван  сая дахь иргэн 2047 онд төрнө гэсэн тооцоолол байна” хэмээн Үндэсний статистикийн хорооны Хүн ам, нийгмийн статистикийн газрын дарга А.Амарбал мэдээлэв.