Шоронгоос зугтсан "Исламын улс"-ын дайчид Сирид тулалдсаар байна

“Лалын улс”-ын дайчид курдуудын хяналтад байдаг шоронгоос хоригдлуудыг гаргахыг оролдсоны дараа Сирийн зүүн хойд нутагт ширүүн тулаан эхэлжээ.

Хасака хотод пүрэв гарагаас эхлэн Курдын цэргүүд АНУ-ын агаарын хүчний дэмжлэгтэйгээр исламистуудтай тулалдаж байна. Цэргийнхэн шоронг бүсэлж, ойр орчмын хорооллыг хяналтандаа авахын төлөө тэмцэж байгаа бол харин  нутгийн иргэд гэр орноо орхин дүрвэж байна.

Гвайран шоронд хийсэн халдлага нь тус бүлэглэлийн бараг гурван жилийн өмнө Сирид ялагдсанаас хойшхи хамгийн том довтолгооны нэг юм.

Лондонд төвтэй Сирийн Хүний эрхийн  байгууллагын мэдээлснээр, хэт их ачаалалтай тус байгууламжид Лалын улсын 3500 сэжигтэн, тэр дундаа тус бүлэглэлийн зарим удирдагчид  хоригдож байжээ. Хэдэн зуун жихадистыг аль хэдийн эргүүлэн баривчилсан ч зарим нь оргон зайлсан хэвээр байна.

Сирийн хяналтын төвийн мэдээлснээр, мөргөлдөөний үеэр Курдын 28 цэрэг, таван энгийн иргэн, Исламын бүлэглэлийн 58 гишүүн амь үрэгджээ.

Урд өдөр нь тус бүлэглэл шорон руу халдлага үйлдэж олон дэмжигчдээ сулласан тухай мэдээлсэн видео бичлэгийг нийтэлсэн юм. Бичлэгээс харвал дайчид хэд хэдэн хүнийг барьцаалсан байх магадлалтай байгаа юм. 

"Исламын улс"-ын дайчид болон тэдний эхнэрүүд Сирийн шоронгоос бөөнөөрөө оргох  яг ийм хувилбарыг олон жилийн турш хүлээж байсан юм.

Британийн харъяат хоёр жихад Эль-Шафи Эльшейх, Александра Коти нар шоронгоос өгсөн ярилцлагадаа тэсрэх бодисоор дүүргэсэн хогийн машины ачаар шоронгоос хэрхэн мултрах тухай төсөөлж байснаа ярьжээ. 

Одоо Сирийн зүүн хойд хэсэгт болж буй халдлагын үеэр жихадистууд шорон руу нэвтрэхийн тулд түлшний машин ашигласан байж магадгүй юм.

Энэ нь Исламын бүлэглэл  оргон зайлах оролдлого хийсэн анхны тохиолдол биш бөгөөд  хамгийн сүүлд 2019 онд Дерик хотод болж байв. 

Их Британийн иргэд болон Европын бусад жихадистууд энэ шоронд хоригдож байгаа юм. Мөн Исламын  дайчдын эхнэрүүд  нөхрүүдийгээ шоронгоос зугтаж чадна, тэгээд  эргэн нийлнэ гэж найдаж байгаагаа хэлжээ.

Жихадистуудын энэ халдлага нь хэдийгээр тус бүлэглэлийн хүч салж сарниж хүчгүй болсон ч аюул заналхийлэл хэвээр бөгөөд томоохон тулаан хийх боломжтой гэдгийг сануулж байна.

Эх сурвалж: ВВС