Ирэх намар зуух яндангийн шахаа хийнэ гэдгээ Б.Бат-Эрдэнэ сайд ил зарлачихав уу

Улаанбаатарын утааг бууруулж чадаагүй гэсэн үндэслэлээр Н.Уртнасан сайдын багийнхныг нь чөлөөлсөн. Утаа Уртнасантай хамт явахгүй нь  тодорхой ч энэ ажилд бодитой шийдэл, шинэ бодлого хандлага хэрэгтэй гэсэн үүднээс Б.Бат-Эрдэнэ  хэмээх залууд  энэ салбарыг даатгасан нь тодорхой.  Залуу сайд ч ажлаа  их эрч хүчтэй эхэлж байгаа бололтой явсан суусан, үзсэн харснаа, үзэл бодлоо цахимаар цацсаар л байна.

Ямартай ч баруун зүүн бүсийн үйлдвэртэйгээ танилцаж, түрүүчээсээ зарим нэг шийдэл гаргаж байгаа бололтой юм.  Энэ тухайгаа өчигдөр мэдээллээ.

Баруун бүсийн үйлдвэрийг энэ намартаа нүүлгэж, зүүн бүсэд 10 сая ам доллар буюу 30 орчим тэрбумаар шинэ үйлдвэр барина гэж байна. Байж болох л шийдэл байх. Үүний зэрэгцээ агаарын бохирдлыг ганцхан шахмал түлшээр хязгаарлаж болохгүй. Олон асуудал яригдана гэлээ. Энэ ч бас зөв биз.

Шинэ сайд бас агаарын бохирдолтой тэмцэх ажлын хүрээнд эрдэмтэн судлаачдын багийг байгуулж байгаагаа дуулгалаа. Үүгээр стандартын асуудал хөндөгдөнө гэв.  Юуны өмнө яндангаар гарч байгаа утааны стандартыг тогтооно гэдгээ тодотголоо.  Мань мэт нь бол утааны стандарт гэхээр сайн ойлгож чадахгүй л байна. Би гэр хорооллын оршин суугч. Ирэх жил яндангаас гарах утаагаа яаж стандартад тэнцүүлэх вэ гээд бодлогошрох, эргэлзэх янзтай л сууна.  Бодоод байсан чинь түлшнээс л утаа гардаг. Тэгэхээр түлш ямар байна утаа тийм л стандарттай байх гээд байна. Ингэж харвал түлшээ л тэр утааны стандартад тохируулж үйлдвэрлэх арга зам байгаа байх.

Шинэ сайдын ширүүхэн шийдлийн нэг нь ирэх намар зуух яндангийн асуудал бачууруулж, балмагдуулж мэдэхээр юм шиг байна. Сайдын хэлснээр гэр хороололд бүртгэлтэй айл өрх, албан байгууллагын 182 мянган нам даралтын зуухыг 2022 оны есдүгээр сарын 15-ны өдрөөс эхлэн сайжруулсан шахмал түлшээр галлахгүй. Харин тэрний оронд нам даралтын зуухыг цахилгаан, хий гэх мэт өөр шийдлээр шийддэг болох юм байна.

Хэрэв энэ 182 мянган нам даралтын зуух гэдэг тоонд итгэх юм бол гэр хорооллынхон бараг бүгдээрээ л нам даралтаар халдаг байж таарах гээд байна. Тэгээд энэ 182 мянган зууханд сайжруулсан түлш түлэхгүй, цахилгаан, хий  мэтийн өөр шийдлээр галлана гэвэл мөнөөх сайжруулсан түлшний  маань хэрэглээ бараг хасагдах ч юм шиг.  Энэ мэт эргэлзээ байна.

Өнөөдөр хэрэглэж байгаа утаатай утаагүй энэ олон  зуух  цахилгаан болон хийгээр ажиллаж  чадах уу, техник талаасаа дүйцэх үү, технологи нь таарах уу гэдэг бүр ч том асуудал болоод явчихлаа. Тэгэхээр  ирэх намар хэрэглэгчид бас цахилгаан, хийгээр ажиллах боломжтой шинэ зуух хүлээж авах нь баараггүй юм шиг байна.

Товчхондоо дахиад зуух тараах  бололтой. Ер нь иймэрхүү  яриа Бат-Эрдэнээс ч урьд чих дэлсэж байсан нь бий. Энэ бол эргэлзэх юмгүй танил технологи.  Хэн нэг эрх мэдэлтэн, аль нэг даргын төрд хийж буй шахаа явж байгаа нь энэ байх.

Сайд  ажлаа аваад ганцхан өдрийн дараа ингэж цахилгаан, хийгээр ажилладаг зуух яндангаа зарлалаа. Түүний түрүүлж хэрэгжүүлэх нэг даалгавар нь энэ зуухны шахаа байж мэднэ. Улаанбаатарын утаа гэсэн малгай дор эрх мэдэлтнүүд ичиж эмээх юмгүйгээр төсвийн мөнгийг гарын салаагаар урсгах дархан эрхтэй болдог юм шиг байна.

Саяхан дуулдаж байсан нэг тооцоогоор утаанд зарцуулсан хөрөнгө мөнгө  900 тэрбум төгрөгөөс давж нэг их наяд гэсэн их тоонд дөхөж байгаа юм билээ. Гэтэл үр дүн нь өнөөдрийн Улаанбаатарын агаар. Одоо дээр нь нэмээд ирэх намар төсвийн хэдэн зуун тэрбумаар зуух яндангийн шахаа хэрэгжих магадлал бас байна шүү, татвар төлөгчид өө.  

Энэ дарга өчигдөр барилгын компаниудын харуул сахиулууд хотын төвд гэрээ барьчихаад гал их түлж байна гэж утааны бас нэг эх үүсвэрийг нэрлэлээ.  Үргэлжлүүлээд  хөл дүүжлэх унааг минь ад үзэх янзтай. Нийслэлийн иргэд  өглөө бүр машинаа халаагаад байгаа учраас агаар бохирдоод байна гэж өөнтөглөв. Хөхөө өвлийн хүйтнээр машиндаа бээвийж бөөвийгөөд явж байвал сайдад  таалагдах нь.

Монгол төрийн маань сайд ингээд ярихаар гомдмоор ч юм шиг. Ингэж ад үзэгдэж байхаар тэр Америк, Солонгос руу явмаар ч юм шиг...