Өргөн хэрэглээний барааны үнэ хэзээ буурах вэ

Монголчуудыг хамгийн ихээр сөхрүүлж байгаа нь өргөн хэрэглээний барааны үнийн өсөлт.  Ямар сайндаа л цар тахал гэхээсээ илүүтэй  үнийн өсөлт цагаан сарыг хойш чангааж байна хэмээн өвгөд хөгшид өөр зуураа ярьж хэлэлцэж байхав.

Эрх биш Эрээнд гацсан чингэлэгүүдээ  татан авч байгаа болхоор барааны хомсдол тавигдах байх. Ачаа бараагаа татан авах явцад үнийн хөөрөгдөл үүсгэхгүй байх арга боломжийг  Засгйн газар хэр чинээндээ бүрдүүлсэн нь сайшаалтай. Тухайлбал, хилийн “0” цэгээс Замын-Үүд хүртэлх тээврийг хилийн цэргийнхнээр хийлгэж, харин Замын-Үүдээс Улаанбаатар хүртэлх нэг машины тээврийн үнийг  3.5 саяас хэтрүүлэхгүй байхаар зохицуулалт хийсэн. Энэ нь бараг цар тахлын өмнөх үеийн үнэ тарифтай ойролцоо юм. 

Монголын талын тээвэрчид, хятадуудтай хамтарч барааны үнийг хөөрөгдсөн гэдгийг эх сурвалжууд мэдээлсээр байгаа. Иргэдээ ядарч доройтож,  цар тахлын улмаас  зүдэрч зүтгэж байгаа үед нь харийнхантай хамтарч  үнэ хөөрөгдөж байгаа тэр хүмүүсийн “эх оронч” сэтгэлийн илэрхийлэл нэг иймэрхүү.

Үнийн энэ хөөрөгдлөөс болж инфляци хоёр оронтой тоо руу хальтарч, сүүлийн сарын байдлаар 15 хувьд хүрээд байна. Хэдийгээр цар тахалттай байгаа ч нэгэнт л УОК хааж хориглоогүй юм чинь  ёс билэгдэл гээд айл бүр л цагаан ногоон сардаа тэрүүхэндээ бэлдэж байна.

Энэ нь эрэлтийг нэмэгдүүлж байж таарах ч манайхан  баяр ёслол тааруулан үнэ хөөрөгдөхдөө гаргуун шүү дээ.  Харамсалтай нь нэмэгдсэн үнэ эргээд буудаггүйд л хамаг учир байгаа юм. 

Цар тахлын улмаас дэлхийн улс орнуудад инфляци өссөн гэх мэдээллийг Сангийн сайд дахин дахин давтдаг. Сайдын хэлж байгаагаар одоо Монголын инфляци, Оросын инфляци гэж байхгүй болсон, дэлхий нийтийнх л гэж байгаа бололтой юм.

Хэрэв тийм бол бас дуулгах нэг мэдээ байна аа. Эрээний боомт хаагдсан үед Монголд “гал залгуулж” байсан ОХУ-д ургамлын тос, өндөг, элсэн чихэр гэхчлэн өргөн хэрэгдээний барааны үнэ буурчээ. Тодруулбал, ОХУ-ын статистикийн газрын мэдээллээ дотооддоо нэгдүгээр сарын 11-14-ний хооронд гурвалжин будааны үнэ 0.42 хувиар, элсэн чихрийн үнэ 0.46 хувиар буурч, наранцэцгийн тос, тахианы мах, өндөгний үнэ хямдарч, үхрийн махны үнэ 0.25 хувиар өссөн талаар мэдээлжээ.

Харин манай урд хөршийн хувьд өргөн хэрэгээний барааны үнэ цар тахлын үед тогтвортой байгаа гэсэн мэдээлэл байдаг.  Тэгвэл энэ мэт үнийн өөрчлөлтийг дагаад манай  импортлогчид  үнэ өртөгөө  бууруулах уу. Монголд импортын бараа дор хаяж хоёр нугалсан үнээр зарагддаг.

Ямартай ч, үнийн өсөлтийн буруутнаар нэрлэгдээд байсан  тээврийн зардлыг  Засаг ийнхүү хяналтад авлаа. Манай бизнес эрхлэгчид одоо үнэ хөөрөгдөх шалтаг, шалтгаангүй болж чадсан уу. Бас өргөн хэрэгдээний барааны үнэ буурах уу...

М.Нэргүй