Өмнөд Солонгост “омикрон" хувилбарын халдвар авсан хүмүүсийг гэрээр эмчилнэ

БНСУ-д коронавирусний “омикрон” хувилбараар халдварласан өвчтөнүүдийг нэгдүгээр сарын 19-нөөс эхлэн гэрээр эмчлэхээр болжээ. Энэ тухай лхагва гарагт тус улсын гамшигтай тэмцэх төв штаб мэдэгдсэн байна.

Тус төвийн төлөөлөгчийн хэлснээр, “омикрон” хувилбар нь “дельта”-тай харьцуулахад ихэнх тохиолдолд хөнгөн өвчлүүлж байгаа тул ийм шийдвэр гаргасан байна. Өмнөд Солонгост уг хувилбарын халдвар авсан хүмүүс өвчний явц шинж тэмдэггүй байсан ч эмнэлэгт эмчлүүлж байгаа аж.

“Сүүлийн шийдвэрийн дагуу зөвхөн архаг хууч өвчтэй болон эрсдэлтэй бүлэгт хамаардаг өвчтөнүүд эмнэлэгт эмчлүүлнэ” гэж штабын төлөөлөгч тэмдэглэжээ. Тэрбээр гэртээ эмчилгээ хийлгэж буй өвчтөнүүд хорио цээрийн дэглэмийг чанд сахиж, өрөөгөө тогтмол агааржуулах ёстойг сануулсан байна.

БНСУ-д өнгөрсөн хоногт коронавирусний халдварын шинэ тохиолдлын тоо сүүлийн 20 хоногт анх удаа 5000-ыг давж, 5805 тохиолдол бүртгэгджээ. Тус улсын Өвчнөөс урьдчилан сэргийлэх, хяналт тавих газраас мэдээлснээр, шинэ тохиолдлуудын 374 нь гаднаас зөөвөрлөгдсөн бол үлдсэн нь дотооддоо халдвар авсан байна.

БНСУ-д цар тахал дэгдсэнээс хойш халдвар авсан нийт хүний тоо 705 900-д хүрчээ. Өнгөрсөн хоногт 74 хүн халдварын улмаас нас барж, нас баралтын тохиолдлын тоо 6 452 болсон байна. Эмнэлгүүдэд хэвтэн эмчлүүлж буй өвчтөнүүдийн 532-ынх нь биеийн байдал хүнд, нэн хүнд байна.

Эх сурвалж: Montsame.mn