Уриалахаас хэтэрдэггүй УОК

Энэ сарын 10-нд шиг санаж байна. Омикрон илэрсний маргааш өдөр нь УОК  шуурхай хуралдаж байна, хурлаас гарсан шийдвэрээ 18.00 цагаас мэдээлнэ гэв. Харин 18.00 цагаас хойш УОК-оос “цагаан сарыг гэр бүлийн хүрээнд цомхон тэмдэглэх зөвлөмж” гаргалаа гэсэн мэдээлэл цахим орчинд түгэв. Уг нь 2022 он гарсаар халдварын тоо нэмэгдчихсэн,  дээрээс нь омикрон ороод ирсэн болхоор иргэдийн хувьд цагаан сараа цомхон тэмдэглэхээ УОК-оор зөвлүүлэлтгүй мэдэж байгаа л даа.  Зөвхөн ийм зөвлөмж гаргахын төлөө хуралдаагүй байх. Бодвол бусад хэлэлцсэн асуудлууд нь салбар салбарынх байсан биз.

Өчигдөр УОК цахимаар дахин хуралджээ. Мөн л цагаан сарын баярыг зөвхөн гэр бүлийн хүрээнд тэмдэглэх, айл өрхөөр орж халдвар тараахгүй байх тухай уриаллаа гэнэ. УОК уриалснаар ажил хэргээ шийдвэрлэдэг болсон юм шиг байна.

Мөн сэрэмжлүүлгийг олон нийтэд түгээх шийдвэр гаргажээ. Бас халдварын тоо 60 мянга хүрсэн ч хөл хорио тогтоохгүй гэж С.Амарсайхан дарга мэдээлжээ. Цагаан сарын бөхийг барилдуулна гэлээ.

“Халдварын тохиолдлыг хөл хориогоор хязгаарлах нь халдварын тархалтыг бууруулах, иргэдийн  эрүүл мэндэд тустай ч,улс орны эдийн засагт сөрөг нөлөөтэй” гэсэн санааг тэр байн байн илэрхийлдэг. Эндээс шууд уншигдах логик нь иргэдийн эрүүл мэндээс илүүтэй аж ахуйн нэгжийн ашиг орлого чухал гэсэн  агуулга. Зөв байж болох ч эрүүл иргэнтэй байж эдийн засгаа хөдөлгөнө гэсэн агуулгыг байнга хоёрдугаарт тавьж ирсэнд нь гайхаж эргэлзмээр. Энэ нь хөл хорио тавь гэсэн ойголт огт биш. Маневар, менежмент гээд аливаа зорилтыг хэрэгжүүлэх олон янзын шийдэл бий. Бас шийдвэр шинжлэх ухаанч байх чанар.  

Эрээний боомт хаагдсан, Гашуунсухайтаар экспортын нүүрсээ гаргаж чадахгүй болсон, зэсийн баяжмалаа Замын-Үүдэд гацаасан зэрэг эдийн засгийн хамаг болж бүтэхгүй бүхэн халдвараа хязгаарлаж чадахгүй арчаагүйтэж байгаа Монголын төрд өгсөн хөрш орны сануулга шүү дээ. Хятадууд хэлээд байгаа, Та нар халдвараа хязгаарлаж, дэг журмаа барь. Тэгвэл хилээ нээхэд бэлэн байна гээд.

Гэтэл сайд дарга нар нь “Олимп бушуухан дуусаасай. Тэгвэл эдийн засаг сэргэх гээд байна” хэмээн ярьж байгаа нь арай л хэтийдсэн эндүүрэл үү.

УОК нь онцгой байж чадаагүйн гай энэ мэт. Эдийн засгийн гарз хохирлоос гадна ковидоор амь насаа алдсан 2000 гаруй эрдэнэт хүний  амь нас ч мөн яригдана.

Иргэд цагаан сар тэмэдэглэх эсэх талаар УОК тодорхой шийдвэр хүлээж байсан. Цахим орчинд ч гэсэн энэ талаар шаардаж байв. Уг нь УОК-ын шийдвэр дүлэгнэсэн, дундыг  баримталсан бус, түс тас, хатуу хариуцлагатай, иргэдийнхээ эрүүл мэнд, амь насыг эн тэргүүнд нь эрэмбэлэсэн байх учиртай. Тэгснээс уриалж байна, зөвлөж байна гэхчлэн тодорхой шийдлийг бүрхэгдүүлсэн бүүдгэр байж боломгүй санагдаж байна.

Одоогийн байдлаар 7 аймаг цагаан сар тэмдэглэхийг хориглож, олон нийтийн арга хэмжээг хязгаарлаад байна. Ийм л тодорхой байдлыг иргэд хүлээгээд байсан хэрэг.

Г.Хан