Утаанаас болж “Таван толгой түлш” ХХК захирал М.Ганбаатар ажлаас чөлөөлөгдөх ёстой юу

Өнөөдөр Засгийн газрын шийдвэр гарч БОАЖ-ын сайд, Дэд сайд, Төрийн нарийн бичгийн дарга нарыг ажилдаа хайнга хандаж утааны эсрэг дорвитой арга хэмжээ авч чадаагүй тул ажлаас нь чөлөөлөв.  Үүнээс гадна Ерөнхий сайд Л.Оюун-Эрдэнэ Нийслэлийн Засаг дарга Д.Сумъяабазарт агаарын бохирдол хариуцсан дарга нарт хариуцлага тооцохыг даалгасан.

Тэгвэл хариуцлага хүлээж, үүрэгт ажлаасаа чөлөөлөгдөх дарга нарын нэг бол “Таван толгой түлш” ХХК-ийн гүйцэтгэх захирал М.Ганбаатар юм.

Утаагүй, чанартай түлшээр хангах үүрэг бүхий “Таван толгой түлш” ХХК-д шил шилээ дарсан асуудлууд өмнө нь цөөнгүй удаа гарсан. Тухайлбал “Таван толгой түлш” ХХК-ийн Налайхын үйлдвэрийг ашиглалтад оруулах ажилд компанийн удирдлага хайнга хандаж цаг алдсанаас, ид ажлын үед ажил хаялт болж М.Ганбаатар захирал шүүмжлэлд өртөж байв. Мөн утаагүй түлшний барьцалдуулагч бодисыг нөөцлөөгүйгээс түлш тасалдалд орсон. Өдгөө нөөцгүй гэх үндэслэлээр гурил ашиглан барьцалдуулж буй нь багагүй шүүмжлэл дагуулж байгаа. Энэ мэт алдаа дутагдал гаргасан “Таван толгой түлш” ХХК-ийн захирал М.Ганбаатар ажлаас чөлөөлөгдөхгүй үлдэх юм биш биз. Утаа нэмэгдсэн шалтгааныг иргэдээс хайх бус ажил хариуцсан дарга нарт арга хэмжээ авахыг ард иргэд хүлээж буй.