Утааны асуудлаар Д.Ихбаяр, М.Ганбаатар нарт хариуцлага тооцох уу

Ерөнхий сайд Л.Оюун-Эрдэнэ Нийслэлийн Засаг дарга Д.Сумъяабазарт агаарын бохирдол хариуцсан дарга нарт хариуцлага тооцохыг өнөөдөр даалгасан.

Тэгвэл хариуцлага хүлээж, үүрэгт ажлаасаа чөлөөлөгдөх дарга нарын тэргүүн эгнээнд Нийслэлийн Засаг даргын Агаар, орчны бохирдол хариуцсан орлогч Д.Ихбаяр, “Таван толгой түлш” ХХК-ийн гүйцэтгэх захирал М.Ганбаатар нарын нэрс яригдаж байна.

Агаарын бохирдол дахин гамшгийн хэмжээнд хүрсэн шалтгааныг Засаг даргын орлогч Д.Ихбаяр тайлбарлахдаа “Хямд түлшийг иргэд их хэмжээгээр түлснээс агаарын бохирдол нэмэгдсэн” гэх утгатай үг хэлж, олон нийтийг эгдүүцүүлсэн. Харин М.Ганбаатараар удирдуулсан “Таван толгой түлш” ХХК-ийн түлшний чанар муудаж, уугилт ихтэй байгаагаас хэл ам дагуулж байгаа.

Утаагүй, чанартай түлшээр хангах үүрэг бүхий “Таван толгой түлш” ХХК-д шил шилээ дарсан асуудлууд өмнө нь цөөнгүй удаа гарсан. Тухайлбал “Таван толгой түлш” ХХК-ийн Налайхын үйлдвэрийг ашиглалтад оруулах ажилд компанийн удирдлага хайнга хандаж цаг алдсанаас, ид ажлын үед ажил хаялт болж М.Ганбаатар захирал шүүмжлэлд өртөж байв. Мөн утаагүй түлшний барьцалдуулагч бодисыг нөөцлөөгүйгээс түлш тасалдалд орсон. Өдгөө нөөцгүй гэх үндэслэлээр гурил ашиглан барьцалдуулж буй нь багагүй шүүмжлэл дагуулж байгаа. Энэ мэт алдаа дутагдал гаргасан “Таван толгой түлш” ХХК-ийн захирал М.Ганбаатар ажлаас чөлөөлөгдөхгүй үлдэх юм биш биз. Утаа нэмэгдсэн шалтгааныг иргэдээс хайх бус ажил хариуцсан дарга нарт арга хэмжээ авахыг ард иргэд хүлээж буй.

Хотын дарга Д.Сумъяабазар Ерөнхий сайдын өгсөн үүрэг чиглэлийн дагуу Д.Ихбаяр, М.Ганбаатар нарт хариуцлага тооцох магадлал өндөр юм.

А.Уянга