ҮХЦ энэ долоо хоногт давхар дээлийг хэлэлцэж, Засгийн “зангилаа”-г тайлах уу

Засгийн газрын гишүүдийг давхар дээлтнүүдээр солих эрх баригчдын операци наашаа ч үгүй, цаашаа ч үгүй гацчихаад   МАН-ын бүлгийн санаархагчид  хийгээд горилогч гишүүдийг  уур бухимдлыг барж байна. Энэ янзаар удвал УИХ-ын  тэвчээр барагдаж хаврын хавсарга дундуур Засгийн газраа огцруулж,  “шараа тайлж” магадгүй.

Гэвч МАН  ашиг сонирхолынхоо төлөө хуулийг гууль болгож, зарлигийг цаас болгож чадах арга чаргатай. Энэ ид шидээрээ давхар дээлээ өмсөж л таарах биз. 

Ийм ажиллагаагаа сөрөг хүчний хоёр гишүүнээр давхар дээлтэй гишүүдийн тоог хязгаарласан Үндсэн хуулийн заалт нь хүний эрхийг зөрчиж байна гэсэн агуулгаар Үндсэн хуулийн цэцэд гомдол гаргуулаад хүлээж буй.  ҮХЦ-ээс  уг асуудлаар маргаан үүсгэж өнгөрсөн арванхоёрдугаар сарын 27-ны өдөр дунд суудлын хуралдаанаар хэлэлцэхээр товлосон ч УИХ-ын итгэмжлэгдсэн төлөөлөгч Н.Энхболдын хүсэлтээр хойшлуулаад байгаа. Энхболдын хүсэлтээр ч юу байхав. Үүнийг Ерөнхийлөгчийн захиалгаар  хойшлуулсан гэдгийг хэвлэл мэдээллийнхэн тодотгож байгаа.

Харин горилогч хүлээгчдийн хувьд таатай байж мэдэх нэгэн мэдээлэл гэвэл ҮХЦ-ийн дунд суудлын хуралдаан энэ долоо хоногийн сүүлчээр буюу энэ сарын 14-нд хуралдаж давхар дээлийн асуудлыг хэлэлцэнэ гэсэн мэдээллийг Ардчилсан намын ерөнхий нарийн бичгийн дарга Ч.Өнөрбаяр өчигдөр дуулгав. Гэхдээ энэ мэдээлэл бүрэн дүүрэн баталгаатай эсэх нь эргэлзээтэй.  Тэрбээр энэ хуралдаанаас гарах шийдвэрийг “дэлхийн шившиг” гэж тодотгожээ.

“Дэлхийн шившиг” гэж  дэврүүлж хардаггүй юмаа гэхэд хоёр гуравхан жилийн өмнө нэмэлт өөрчлөлт оруулсан Үндсэн хуулиа хэн нэгний гомдол саналаар өөрчлөөд байх нь сайн зүйл биш л дээ.  

Ер нь яаж ч бодсон, аль ч талаас нь харсан УИХ-ын гишүүн биш бол сайдад жулдаж байна гэж харах нь маш том тэнэглэл, улс төрийн ялгаварлан гадуурхлалт гэж л харагдана. Засгийн газраа тогтвортой байлгах, нэг  хэсэг хүмүүсийнхээ амбиц хүслийг хангах гэхчлэн улс төрийн зорилгоор  ийм юм хийх нь муу жишиг л болж үлдэх байх.

Монголд одоогоор болж бүтэж байгаа юм бага л байх шиг харагдаж байна. Гэхдээ боломжийн төлөвлөгөө, том амбиц бий.

Гэвч холынх. Харин ойрын шийдэл, одоогийн асуудлаа эхлээд шийдчих хэрэгтэй байна. Цахим үндэстнээсээ өмнө агаарын бохирдолгүй үндэстэн болох болох, ядуурлаа ядахад тал хувиар бууруулах гэхчлэн өнөөдөр барьж авах ажлуудаа алгасч давхиад баймааргүй байна

Г.Хан