О.Цогтгэрэл: АН-ын бүлгийн үйл ажиллагааг хэвийн явуулах боломжоор хангахыг УИХ-ын даргаас хүсэж байна

УИХ дахь АН-ын бүлгээс цаг үеийн асуудлаар мэдээлэл хийж байна.

УИХ-ын гишүүн О.Цогтгэрэл мэдээлэлдээ, "Өнгөрсөн долоо хоногт бид нар Улсын Дээд Шүүхийн тогтоолыг олон нийтэд мэдээлсэн. Энэ тогтоол дээр хоёргүй утгаар тодорхой зааснаар Ардчилсан намын маргаантай асуудал үндсэндээ шийдэгдсэн. Харин одоо УИХ дахь Ардчилсан намын бүлгийн үйл ажиллгаанд саад бэрхшээлтэй асуудлууд байна. 

Бид өнгөрсөн оны 10-р сард УИХ дахь АН-ын бүлгийн дарга Д.Ганбатыг чөлөөлөх асуудлаа УИХ-ын даргад бичгээр мэдэгдсэн. УИХ-ын дарга бол УИХ дахь нам, эвсэл, бүлгийн үйл ажиллагааг хэвийн явуулах хуулиар хүлээсэн үүрэг, эрхтэй албан тушаалтан. Гэтэл асуудлыг шийдвэрлэхгүй өнөөг хүртэл хэдэн сар өнгөрлөө. Тиймээс бид өнгөрсөн долоо хоногт УИХ дахь бүлгийг хэвийн ажиллах боломжоор хангаач гэсэн хүсэлт, шаардлагаа тавьсан. Энэ долоо хоногт бид шаардлагаа дахин тавина.

Шаардлагатай бол Үндсэн хуулийн цэцэд хандана.

Бид нар Д.Ганбат даргын ганцаараа өгч байгаа хэвлэлийн хуралд оролцохгүй байгаа. Цаашид бид хурлаа хийгээд, мэдээллээ өгөөд явна. Тиймээс УИХ-ын даргаас бүлгийн үйл ажиллагааг хэвийн явуулах боломжоор хангахыг хүсэж байна." гэлээ.