Зөөвөрлөгдсөн 199 тохиолдол илэрснээс 92 нь Туркээс бүртгэгджээ

Коронавирусийн омикрон хувилбар 138 улсад бүртгэгдсэн байна. Энэ вирусийн улмаас нас барсан хүний тоо 108 хүрчээ. Энэ талаар дэлгэрэнгүй мэдээллийг Халдварт өвчин судлалын үндэсний төвийн захирал Ц.Билэгтсайхан өглөө.

Тэрээр "Омикрон хувилбар дэлхийн олон оронд тархаж байна. Тухайлбал, Европын холбооны улсууд үүн дотор Автри, Норвеги, Герман улсад сүүлийн 24 цагт халдварын тохиолдол хамгийн их бүртгэгджээ. Түүнчлэн Америк болон Канад улсад халдвар эрчимтэй тархаж байна. Манай улсын хувьд ДЭМБ-ын зөвлөмжийн дагуу эрсдэлд суурилсан хилийн тандалын хариу арга хэмжээг хэрэгжүүлж байна. 11 дүгээр сарын 27-ноос нийт 106 нислэгээр 10 мянга гаруй зорчигч ирсэн. Эдгээрээс 199 зөөвөрлөгдсөн тохиолдол илэрсэн. Халдвар илэрч буй тохиолдлуудыг улс орноор нь ангилбал Туркээс 92 тохиолдол, Тайландаас 29, АНУ-аас 25, БНСУ-аас 12, Дубайгаас 11 тохиолдол зөөвөрлөгдөн бүртгэгджээ. Дубай, Тайланд, Туркээс ирж буй групп аяллаас маш олон зөөвөрлөгдсөн тохиолдол батлагдаж байна. Тиймээс иргэд аяллаа төлөвлөхдөө эрсдэлээ анхаарах шаардлагатай байна. Нийтдээ 106 нислэгийн 59 нислэгээс буюу хоёр нислэгийн нэгээс нь зөөвөрлөгдсөн тохиолдол бүртгэгдэж байна. Үүн дээр манайхаас тандалтын судалгаа хийж, хариу арга хэмжээ авч байна. ЗӨСҮТ болон НЭМҮТ-тэй хамтран ажиллаж байна.

Мөн цагдаа, тагнуул, УОК хамтарч байна. Тусгаарлалтын гурав хоногт байх хугацаанд иргэдээс шинжилгээ авч байна. 48 дахь цагаас нь шинжилгээ авч, 72 цагаас өмнө хариуг гаргаж байна. Бид арванхоёрдугаар сарын 25-наас гурван хоногийн тусгаарлалтыг эхлүүлсэн. Энэ хугацаанд 98 тохиолдол илэрсэн. Ойрын хавьтлын судалгаа хийж, өрх рүү мэдээлэл нь явж байна. Мөн хилийн боомтууд дээр эрсдэлд суурилсан боомтын тандалтын хариу арга хэмжээнүүд хэрэгжиж байна" гэлээ.