Давхар дээл өмсөж “зэрэг нэмэх”-ээр зэхэж байсан УИХ-ын гишүүд ууртай байна

УИХ-ын гишүүн Ш.Адьшаа, Н.Ганибал нарын гаргасан давхар дээлний гомдлоор өнгөрөгч 12 дугаар сарын 27-нд товлогдоод байсан ҮХЦ-ийн дунд суудлын хуралдаан тодорхойгүй хугацаагаар хойшлов.   Энэ нь давхар дээл өмсч “зэрэг нэмэх”-ээр зэхэж байсан УИХ-ын гишүүдийг бухимдуулж, дахин хоног тоолох ядаргаанд оруулчихлаа.

МАН-ын эрх мэдэлтнүүд болон Ерөнхийлөгчийн хүрээнд  ҮХЦ гомдол гаргагчдын талд шийдвэр гаргаад түүнийг нь УИХ хүлээж авч Л.Оюун-Эрдэнийн танхимыг давхар дээлтнүүдээр сэлбэх анхны тохиролцоо байв. Бүр оны өмнө энэ өөрчлөлтийг хийж, явах хийгээд ирэх  хүмүүсийнхээ хүлээлтийг нэг тийш нэг мөр шийдэх хүсэл Ерөнхий сайдад ч байсан байх.

Гэтэл ҮХЦ дуран дээр нь хясна гэгч болгочихлоо. Он гарсаар нэгэн долоо хоног өнгөрөх гэж байхад ҮХЦ энэ хурлын товыг одоо болтол тогтоогоогүй байна. Ийм байсаар байтал сайдын сандал ширээ зүүдэлж, цаг минутаар хүлээж байсан хүмүүс баярлахгүй нь тодорхой шүү дээ.

Мягмар гарагт УИХ-ын Эдийн засгийн байнгын хороо хуралдсан. Тус хорооны гишүүд ууртай байна билээ. Байнгын хорооны дарга Ж.Ганбаатараас эхлээд УИХ-ын гишүүн Ч.Хүрэлбаатар, Б.Энхбаяр, Х.Болорчулуун  нар хатуухан хариуцлага ярьсан. Төмөр замыг УИХ-аар хэлэлцүүлээгүй, Эрдэнэс Тавантолгойн ашгаар олон газрыг санхүүжүүлж ашиггүй болгож байна, Төрөөс авсан мөнгөө төрийн мөнгөөр эргүүлэн төлдөг гэхчлэн  асуудалд гишүүд тун бухимдангуй байв.

Ер нь ҮХЦ-ийн хуралдаан хойшилсноос хойш гишүүд УИХ-ын гишүүд тун ууртай байгаа гэсэн яриа  дуулдаад байна. Давхар дээл өмсөхөөр догдолж байсан зарим нэг нь бүр галзуурахад “ганц хуруу дутуу” гэгчээр тун давчуухан яваа сурагтай.  

Дан дээлтэй сайд нараа хялайж хардаг, дуудаж загнадаг болсон юм байх. Үүнээс нь цэрвэсэн сайд нар дөлж давхиад УИХ-ын хороодын хуралдаанд  очихгүй байгаа, хөөрхий муусайн дэд сайдуудаа илгээдэг болсон гэнэ. Үнэхээр ч өчигдрийн хуралдаан дээр нэг ч сайд харагдсангүй, харин хэд хэдэн яам газрын дэдүүд л тэнд  бүлтгэнэж байгаа харагдана лээ. Монголбанкны дэд Ерөнхийлөгч Г.Дөлгөөнөөс эхлээд чичлүүлж  “чимхүүлсэн” нь байгаа байх.

ҮХЦ-ийн хуралдаан  хойшилсноор УИХ, Засгийн газрын хооронд  цээлийн ус цалгиж, цэгээн чулуу хагарч эхлэв үү гэж харагдаж байна.  Давхар дээлийн асуудал эрх баригч намын дунд хэрүүлийн алим болж, төрийн ордны хоёр талд дан дээлтэнгүүдийн Засгийн газар, давхар дээл хүлээсэн УИХ-ын гишүүд өөд өөдөөсөө  хялайж харах талцал үүсч магадгүй юм.

Давхар дээлээ өмсөөгүй горилогчид Засгийн ажлыг УИХ дээр унагаахаа, хойш нь чангахаа өлхөн чадна. Энэ ч бас бага хэрэг.

Хэрэв энэ Засгийн газарт цаашид  дан дээлтэй сайдууд олонх байсаар байвал УИХ гишүүд Л.Оюун-Эрдэнийн танхимыг зайлшгүй өнхрүүлж таарна. Засгийн газрыг унагах ажиллагааг гардан зохион байгуулагчид нь мөнөөх давхар дээл өмсөхөөр санаархагчид, горилогчид байх болно гэдэг нь бүр тодорхой. Ингэж тэд хорслоо тайлж, хожлоо авах арга зам хайна.

УИХ-ын гишүүд ууртай байна. Тэднийг тайвшруулах ганц тун нь давхар дээл л байх гээд байна.

Б.Тулга