Улаанбаатар-Дархан чиглэлийн автозамыг 2023 онд дуусгана

         Өнөөдөр засгийн газрын ээлжит хуралдаан болж хэд хэдэн асуудлыг хэлэлцлээ. Үүнд гацаад байсан УБ-Дархан чиглэлийн автозамын асуудал хөндөгдлөө. Монгол Улсын Засгийн газрын 2018 оны 09 дүгээр сарын 05-ны өдрийн хуралдаанаар Улаанбаатар-Дархан чиглэлийн авто замыг 4 эгнээ бүхий авто зам болгон өргөтгөн, шинэчлэх шийдвэрийг гаргаад байсан.  Улмаар тус чиглэлийн авто замыг 4 эгнээ болгох шийдвэрийн хэрэгжилтийг одоо байгаа авто замыг ашиглан, нэмж 2 эгнээ авто зам барих техникийн шийдлийг тодорхойлсон.

Өөрөөр хэлбэл одоо байгаа 2 эгнээ авто замыг АХБ-ны “Бүс нутгийн авто зам хөгжүүлэх, засвар арчлалтын төсөл”-ийн хүрээнд өргөтгөн, шинэчлэхээр шинээр нэмж барих 2 эгнээ авто замын Европын сэргээн босголт, хөрөнгө оруулалтын банкны хөрөнгө    оруулалтаар барьж байгуулахаар төлөвлөсөн.  Харамсалтай нь энэ төсөл цаг тухайд нь ажлаа хийдэггүй, хариуцлаггүй байдлаас үүдэж гацаанд ороод байсан.

Харин өнөөдрийн засгийн газрын хуралдаанаар төслийг урагшлуулах, гүйцэтгэж дуусгах талаар хэлэлцэж, Ерөнхий сайд Л.Оюун-Эрдэнэ үүрэг чиглэл өглөө. Үүнд УБ-Дархан чиглэлийн автозамын төслийг 2023 оны 10-р сараас хэтрүүлэхгүй дуусгахыг даалгалаа.  Энэ төслийн хүрээнд шинэ ажлын хэсэг байгуулагдсан бөгөөд ажлын хэсгийг ЗТХ-ийн сайд Халтараар удирдуулан зохион байгуулахаар боллоо. 

Б.Сугар