Т.Баярхүү: Цагаан сарыг хязгаарлаж хориглосон зүйл байхгүй

Засгийн газрын өнөөдрийн ээлжит хуралдаанаас гарсан зарим шийдвэрийн талаар танилцууллаа. Цар тахлын хуулийг сунгасантай холбоотойгоор зарим журам, заалтыг өөрчилсөн талаар УОК-ын нарийн бичгийн дарга Т.Баярхүү мэдээллээ. 

УОК-ын нарийн бичгийн дарга Т.Баярхүү: Цар тахлын хуулийг сунгасантай холбоотойгоор зарим журмыг өөрчлөх шаардлагатай болсон ба албажсаны дараа дэлгэрэнгүй мэдээлэл өгье.  Эхний ээлжид эдгээрээс дурдвал, зайлшгүй ажиллах шаардлагатай байгууллагуудаас бусдыг нь хязгаарлаж байсан нь хэвээр мөрдөгдөнө.

Улбар шар түвшинд 18 төрлийн үйл ажиллагааг хязгаарлахаар тогтоосон байсан бол одоо шинэчилсэн журамд 15 болгож бууруулсан. Харин шар түвшинд 5 төрлийн үйл ажиллагааг хязгаарлахаар зохицуулагдсан байсан бол шинэ журамд шар түвшинд ямар нэгэн үйл ажиллагааг хягаарлахгүй, зөвхөн халдвар хамгааллын урьдчилсан сэргийлэх зохицуулалтыг хийж өгөхөөр байгаа. Мөн өмнөх журамд төрийн байгууллага, аж ахуй нэгж, хуулийн этгээд гэдэг байдлаар ялгаатай зааглаж байсныг нэгтгэж зөвхөн хуулийн этгээдэд тавигдах шаардлага байдлаар зохицуулж өгсөн.

Улсын хэмжээний эрүүл мэндийн байгууллага, ЭМЯ халдварын тархалтын түвшинг тодорхойлж УОК-д өгснөөр түүнд тохирсон шийдвэрийг гаргахаар болсон. Тэгэхээр нийтээр нь хорьж, хязгаарлахгүй, зөвхөн тухайн бүс нутагт тохирсон шийдвэрийг гаргана гэсэн үг.

Үйл ажиллагаанд тавигдах шаардлагын тухайд заримыг цуцалсан ба нийт найман шаардлагыг нэгтгэж тав болгосон. Онцолбол, хуулийн этгээд өөрийн үйл ажиллагааны онцлогт тохируулан халдварын эсрэг хариу арга хэмжээг авч ажиллаж боломжтой нөхцөлийг бүрдүүллээ" гэлээ

 Шинэ жилийн баяртай холбогдуулан дотоодод коронавирусийн халдварын тохиолдол нэмэгдэж байгаа талаар ЭМЯ мэдээлсэн. Тэгвэл тун удахгүй болох Цагаан сарын баярыг тэмдэглэх эсэх асуудлыг Засгийн газрын хуралдаанаар ярилцсан эсэх талаар сэтгүүлчид тодрууллаа.

“Энэ асуудлаар УОК, Засгийн газрын хуралдаанаар ярилцсан. Ирэх хоёрдугаар сард болох Цагаан сарын баяраар төрийн байгууллагын түвшинд золголт зохион байгуулахгүй байх шийдвэр гаргасан. Харин ард иргэдийг аль болох өргөн хүрээнд тэмдэглэхгүй байх нь зүйтэй гэсэн уриалга гаргаж байгаа. Өөрөөр хэлбэл, хязгаарлаж хориглосон зүйл байхгүй. Өндөр настнууд, тэр тусмаа вакцинжуулалтад хамрагдаагүй хүүхдүүдэд халдвар тархах эрсдэл байгаа учраас аль болох өргөн хүрээнд тэмдэглэхгүй байхыг уриалсан” гэв.