Дээрэмдүүлсэн хятад иргэн "Бизнесийн түншээсээ авсан мөнгө" хэмээн мэдүүлжээ

Хятад иргэн бүлэг этгээдүүдэд 1.2 тэрбум төгрөгөө дээрэмдүүлсэн гэх мэдээллийг бид хүргэсэн. Улмаар цагдаагийн алба хаагчид шөнө ажиллаж, тухайн этгээдүүдийг илрүүлсэн юм.

Тодруулбал Б, Ө, Д нар дээрэм хийснийг илрүүлж, тэднээс цүнх, чемоданд хийсэн боодолтой 20 мянгатын дэвсгэртүүдийг хураан авсан бөгөөд тэд гар буутай байсан юм.

ЭЦА-ны Хүнд гэмт хэрэгтэй тэмцэх хэлтсийн ахлах мөрдөгч, хошууч Н.Золбоогийн хэлснээр “БНХАУ-ын иргэнийг дээрэмдсэн бүлэг этгээдийг шуурхай эрэн сурвалжилж баривчилсан. Тухайн этгээдүүдийг тухайн шөнөдөө баривчилж, саатуулсан. Өдгөө хэрэг бүртгэлтийн хэрэг нээгдэж, мөрдөн шалгах ажиллагаа хийгдэж байна. Хэргийг Хан-Уул дүүргийн цагдаагийн хэлтэст үргэлжлүүлэн шалгаж байна. Алдагдсан 1.1 тэрбум төгрөгөөс 848 сая төгрөгийг хураан авсан" хэмээсэн.

Тухайн этгээдүүдийг 1980-1990 онд төрсөн 32-42 насны хүмүүс хэмээж байсан ч үүнийг эх сурвалж үгүйсгэлээ. Харин 1993-1997 онд төрсөн байжээ. Гурван этгээдийг барьсан ч цаана нь дахиад хүмүүс байхыг үгүйсгэхгүй учир мөрдөн шалгах ажиллагаа үргэлжилж байгаа юм байна.

Эх сурвалжийн мэдээллээр тухайн хятад иргэн Кан гэх хүн "Бизнесийн хамтрагч, түншээсээ авсан мөнгө" хэмээн мэдүүлжээ. Түүнийг Налайх-Улаанбаатар чиглэлийн авто замын бүтээн байгуулалтад оролцон, хийсэн ажлынхаа төлбөрийг аваад нутаг буцахаар бэлтгэж байсан гэх мэдээлэл ч байна.

Түүнийг их хэмжээний мөнгөтэй байгааг мэдсэн, ойрын хүн нь уг хэрэгт оролцсон байх магадлалтай байгаа юм. Тэд мөнгөө гэр хороололд аваачин нуусан байхад нь олсон бөгөөд камерын бичлэгт тэдний зугтаж буй дүрс ч бичигдэн үлдсэн байна.