Монгол тээвэрчид, тээврийн компаниуд Сангийн сайд Б.Жавхланд хандаж 3 шаардлагыг тавьжээ

Тээвэрчдийн зөвлөлийн тэргүүн Н.Саарал Сангийн сайд Б.Жавхланд хандаж шаардлага тавьж лайв хийжээ.

 

Тэрбээр лайвдаа "Эрхэм сайдын амар амгаланг айлтган мэндчилье. Амьдрал ахуйгаа тэжээх гэж экспортыг нуруундаа үүрч яваа залуучууд дахиад л элгээрээ хэвтэж, хүнд суртал, дарангуйлал дор дарлагдаад, олон мянган тээвэрчид Гашуунсухайт, Цагаан хад суурьшлын бүсэд олон мянгаараа хоригдчихоод, гацчихаад байна, эрхэм сайд аа.

 

Монгол тээвэрчид, Монгол тээврийн компаниуд танд дараах гурван төрлийн шаардлагыг 5 хоногийн хугацаатайгаар хүргэснийг энэ лайваар хүргэж байна.

 

 Нэгдүгээрт, нэгээс хоёрзуун далдугаар бөмбөлөг буюу бүх бөмбөлөгт байгаа бүх тээврийн компани, тээвэрчдийг тэнцүү квотоор шударга эрүүл тэгш зарчмаар тээвэрт оролцуулж өгөхийг шаардаж байна.

 

Хоёрдугаарт,  Өмнөговь аймгийн Засаг даргын ярилцлагыг хэвлэл мэдээллийн байгууллагууд шууд дамжуулж хүргэж байсан.  БНХАУ-ын Баяннуур аймгийн талаас задгай тэвштэй тээврийн хэрэгслээр хилийн таталт хийх, экспорт хийх асуудлыг хөндөн ярьсан. Монголын талд энэ талаар хандсан асуудлыг ярилцаж байсан. Задгай тэвштэй машинаар тээвэрлэлт хийх асуудлыг Монголын тал санаатайгаар гацааж байна гэдэг ийм байр суурь, ойлголтыг бид авсан.  Шороон замаар задгай тэвштэй тээврийн хэрэгслээр тээвэрлэлтэд оролцуулж С бичиг өгч улсын экспортыг нэмэгдүүлэх, олон тээврийн компани олон мянган тээвэрчдийг ажилтай орлоготой байлгах шаардлага тавьж байна.

 

Гуравдугаарт, шинжилгээний зөрүүтэй байдлаас болж хохирсон олон мянган тээвэрчид Гашуунсухайт бүсэд байдаг. Суурьшлын бүс дээр ПИ СИ АР-ын шинжилгээ өгөөд эерэг гардаг. Улаанбаатар хотод ХӨСҮТ-ийн лабораторид шинжилгээ өгөхөөр сөрөг гардаг асуудал нь олон сарын турш явсаар ирсэн. Энэ асуудлыг нэг талд нь шийдэж, эерэг гарсан тохиолдолд тухайн жолоочийг Улаанбаатар хот руу элдвийн унаа тэргээр дайчилж, хөөн гаргах биш давтан шинжилгээнд оруулах, үнэхээр гарцаагүй коронавирусийн халдвартай нь батлагдан тэндээс гарсан тээвэрчдийг яаж, ямар журмаар буцаж тээвэрт оролцох талаарх журмыг Тээврийн зохион байгуулах журамд тусгаж нэмж оруулах шаардлагыг тавьж байна. 

 

Маш олон асуудал байгаагийн хамгийн цөм гурван асуудал нь энэ гэж Монгол тээвэрчид, тээврийн компаниуд үзэж байна. Өнгөрсөн тавдугаар сараас хойш зарим нь тээвэр хийж амьдрал ахуй нь дээшилсэн. Зарим нь нэг ч тээвэрт яваагүй байдаг. Үүнийг Сангийн сайд Жавхлан танаас асууж байна. 

Монгол тээвэрчид, тээврийн компаниудын тавьсан энэ 3 шаардлагыг тун яаралтай шийдвэрлэж өгөх. Эс бөгөөс Монгол тээвэрчид, тээврийн компаниуд хариуцлага нэхэн тэмцлийн хэлбэрт шилжихээ илэрхийлж байна. Шаардлагын хариу өгөх 5 хоногийн хугацаа өгч байна." гэлээ.